ಗಾಯಕಿ ವಾರಿಜಾಶ್ರೀ ಕೈ ಹಿಡಿದ ರಘು ದೀಕ್ಷಿತ್

ಖ್ಯಾತ ಗಾಯಕ ಹಾಗೂ ಸಂಗೀತ ನಿರ್ದೇಶಕ ರಘು ದೀಕ್ಷಿತ್ ಅವರು ಎರಡನೇ ಬಾರಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಾರೆ.

ರುಘು ದೀಕ್ಷಿತ್ ಮತ್ತು ವಾರಿಜಾಶ್ರೀ ನಡುವೆ 16 ವರ್ಷ ವಯಸ್ಸಿನ ಅಂತರವಿದೆ. ವಾರಿಜಾಶ್ರೀ ಅವರಿಗೆ 34 ವರ್ಷವಾದರೆ, ರಘು ಅವರಿಗೆ 50 ವರ್ಷ.

ರಘು ಮತ್ತು ವಾರಿಜಾ ಇಬ್ಬರೂ ಸಂಗೀತ ಕ್ಷೇತ್ರ ಹಿನ್ನೆಲೆಯವರಾದ್ದರಿಂದ ಆರಂಭದ ಪರಿಚಯ, ಸ್ನೇಹಕ್ಕೆ ತಿರುಗಿ, ನಂತರದಲ್ಲಿ ಪ್ರೀತಿಗೆ ಬದಲಾಗಿ, ಇದೀಗ ವೈವಾಹಿಕ ಸಂಬಂಧದೊಂದಿಗೆ ಗಟ್ಟಿಯಾಗಿದೆ. ಕಳೆದ ಫೆಬ್ರವರಿಯಲ್ಲಿ ರಘು ಅವರು ತಮ್ಮ ಇನ್‌ಸ್ಟಾಗ್ರಾಂನಲ್ಲಿ ವಾರಿಜಾಶ್ರೀ ಅವರ ಗ್ರಾಮಿ ನಾಮಿನೇಶನ್ ಅನ್ನು ಅಭಿನಂದಿಸಿ 'ಸ್ನೇಹಿತೆ' ಎಂದು ಉಲ್ಲೇಖಿಸಿದ್ದರು. ಇದಾದ ಕೆಲವೇ ತಿಂಗಳಲ್ಲಿ ತಮ್ಮಿಬ್ಬರ ಪ್ರೀತಿಯ ವಿಚಾರವನ್ನು ಹಂಚಿಕೊಂಡಿದ್ದರು. ಇದೀಗ ಮದುವೆ ಮೂಲಕ ಅಧಿಕೃತವಾಗಿ ತಮ್ಮ ಸಂಬಂಧವನ್ನು ದೃಢಪಡಿಸಿದ್ದಾರೆ.

ವಾರಿಜಾಶ್ರೀ ಜತೆಗಿನ ಪ್ರೇಮ ಸಂಬಂಧದ ಬಗ್ಗೆ ಈ ಹಿಂದೆ ಮಾತನಾಡಿದ್ದ ರಘು, ನಾನು ನಿಜವಾಗಿಯೂ ಊಹಿಸಿರಲಿಲ್ಲ. ಉಳಿದ ಜೀವನವನ್ನು ಒಂಟಿಯಾಗಿರಲು ನಿರ್ಧರಿಸಿದ್ದೆ. ಆದರೆ, ಜೀವನವೂ ತನ್ನದೇಯಾದ ಪ್ಲಾನ್ ಅನ್ನು ಹೊಂದಿತ್ತು. ನಮ್ಮಿಬ್ಬರ ನಡುವೆ ಒಳ್ಳೆಯ ಸ್ನೇಹ ಆರಂಭವಾಯಿತು. ಅದು ಪ್ರೀತಿಯಾಗಿ ಬೆಳೆಯಿತು. ನಾವಿಬ್ಬರು ಒಂದೇ ರೀತಿಯ ಆಸಕ್ತಿಗಳನ್ನು ಹಂಚಿಕೊಳ್ಳುತ್ತೇವೆ ಮತ್ತು ನಮ್ಮಿಬ್ಬರ ನಡುವೆ ಗಟ್ಟಿಯಾದ ಬಂಧವಿದೆ. ವಾರಿಜಾಶ್ರೀ ಅವರ ಹಿರಿಯರ ಆಶೀರ್ವಾದದೊಂದಿಗೆ ಈ ಹೊಸ ಅಧ್ಯಾಯವನ್ನು ಆರಂಭಿಸಲು ಉತ್ಸುಕರಾಗಿದ್ದೇವೆ ಎಂದು ರಘು ಹೇಳಿದ್ದರು.