ಮೇಘನಾ ಗಾಂವ್ಕರ್ ಮುಡಿಗೆ ಡಾಕ್ಟರೇಟ್ ಗರಿ

ನಟಿ ಮೇಘನಾ ಗಾಂವ್ಕರ್ ಅವರು ಶೈಕ್ಷಣಿಕ ಕ್ಷೇತ್ರದಲ್ಲಿ ದೊಡ್ಡ ಸಾಧನೆ ಮಾಡಿದ್ದಾರೆ. ಸ್ಯಾಂಡಲ್‌ವುಡ್‌ನಲ್ಲಿ ಸಕ್ರಿಯವಾಗಿದ್ದರೂ ತಮ್ಮ ಓದನ್ನು ಮರೆಯದ ಮೇಘನಾ, ಈಗ ಅಧಿಕೃತವಾಗಿ ಡಾಕ್ಟರೇಟ್ ಪದವಿ ಪಡೆದಿದ್ದಾರೆ.

ಕನ್ನಡ ಚಿತ್ರರಂಗದಲ್ಲಿ ಥೀಸಿಸ್ (Thesis) ಸಲ್ಲಿಸಿ ಡಾಕ್ಟರೇಟ್ ಪಡೆದ ನಟಿಯರಲ್ಲಿ ಡಾ. ಜಯಮಾಲಾ ಅವರ ನಂತರ ಮೇಘನಾ ಗಾಂವ್ಕರ್ ಎರಡನೇಯವರು ಎನ್ನಲಾಗಿದೆ.

ಮುಂಬೈ ವಿಶ್ವವಿದ್ಯಾಲಯದಿಂದ ಇವರು ಡಾಕ್ಟರೇಟ್ ಪಡೆದಿದ್ದಾರೆ. ಅವರ ಸಂಶೋಧನಾ ವಿಷಯ 'ಸಿನಿಮಾ ಮತ್ತು ಸಾಹಿತ್ಯ' (The metamorphosis of literature into cinema) ಆಗಿತ್ತು.

ಮೇಘನಾ ಅವರು ಪಿಎಚ್‌ಡಿ ಮಾಡಬೇಕು ಎನ್ನುವುದು ಅವರ ತಂದೆಯ ಬಹುದಿನಗಳ ಕನಸಾಗಿತ್ತು. ಈಗ ಪದವಿ ಪಡೆಯುವ ಮೂಲಕ ಆ ಕನಸನ್ನು ನನಸು ಮಾಡಿದ್ದಾರೆ. ಈ ಸಂಭ್ರಮದ ಸಮಯದಲ್ಲಿ ಅವರ ಪೋಷಕರು ಕೂಡ ಜೊತೆಯಲ್ಲಿದ್ದರು.

ಈ ದಿನ ನನ್ನ ತಂದೆಯ ಕನಸು ನನಸಾದ ದಿನ. ನಿನ್ನೆ ನಾನು ಅಧಿಕೃತವಾಗಿ ನನ್ನ ಡಾಕ್ಟರೇಟ್ ಪದವಿಯನ್ನು ಸ್ವೀಕರಿಸಿದೆ. ನನ್ನ ತಂದೆ-ತಾಯಿ ಈ ಕ್ಷಣಕ್ಕೆ ಸಾಕ್ಷಿಯಾಗಿದ್ದು ಈ ದಿನವನ್ನು ಮತ್ತಷ್ಟು ವಿಶೇಷವಾಗಿಸಿತು.ನಿಮ್ಮ ಪ್ರೋತ್ಸಾಹದಾಯಕ ಹಾರೈಕೆಗಳು ನನಗೆ ಉತ್ತಮ ಶಕ್ತಿಯನ್ನು ನೀಡಿದವು. ಹಲವು ವರ್ಷಗಳ ಈ ಸುದೀರ್ಘ ಪಯಣ ಕೊನೆಗೂ ಅಂತ್ಯಗೊಂಡಾಗ ನಾನೊಂದು ರೀತಿಯ ಖಾಲಿ ಭಾವನೆ ಹಾಗೂ ನಿರಾಳತೆಯನ್ನು ಅನುಭವಿಸಿದೆ. ಆದರೆ ನಿಮ್ಮೆಲ್ಲರ ಪ್ರೀತಿಯು ಈ ಸಾಧನೆಗೆ ಒಂದು ಅರ್ಥವಿದೆ ಎಂದು ನನಗೆ ಅನಿಸುವಂತೆ ಮಾಡಿತು. ಆ ಕ್ಷಣದಲ್ಲಿ ನಾವು ಪೂರ್ತಿಯಾಗಿ ಲೀನವಾಗಿದ್ದರಿಂದ ಹೆಚ್ಚು ಫೋಟೋಗಳನ್ನು ತೆಗೆದುಕೊಳ್ಳಲು ಸಾಧ್ಯವಾಗಲಿಲ್ಲ. ಆದರೂ ಆ ದಿನದ ನೆನಪಿಗಾಗಿ ಕೆಲವು ಫೋಟೋಗಳನ್ನು ನಿಮ್ಮೊಂದಿಗೆ ಹಂಚಿಕೊಳ್ಳುತ್ತಿದ್ದೇನೆ. ಎಲ್ಲರಿಗೂ ಧನ್ಯವಾದಗಳು.