'ಪೈಥಾನಿ' ಸೀರೆಯಲ್ಲಿ ಕಂಗೊಳಿಸಿದ ಕಂಗನಾ

ಮನೋಜ್​ ತಪಾಡಿಯಾ ನಿರ್ದೇಶನದ ಭಾರತ ಭಾಗ್ಯ ವಿದಾತ ಸಿನಿಮಾ ಜೂನ್​12ರಂದು ಚಿತ್ರಮಂದಿರಗಳಲ್ಲಿ ಲಗ್ಗೆಯಿಡಲು ಸಿದ್ಧತೆ ನಡೆಸಿದೆ ಆ ಮಧ್ಯೆ ಕಂಗನಾ ರಣಾವತ್​ ಸಿನಿಮಾ ವಿಶೇಷ ಪ್ರದರ್ಶನದ ವೇಳೆ ಮರಾಠಿ ಹುಡುಗಿಯಂತೆ ಮಿಂಚಿರುವ ಫೋಟೋಗಳು ವೈರಲ್​ ಆಗಿದೆ.

ನಟಿ ಮತ್ತು ಸಂಸದೆ ಕಂಗನಾ ಅವರು, ದೆಹಲಿಯಲ್ಲಿ ನಡೆದ ಭಾರತ ಭಾಗ್ಯ ವಿದಾತ ಸಿನಿಮಾದ ವಿಶೇಷ ಸ್ಕ್ರೀನಿಂಗ್​ಗೆ ಧರಿಸಿದ್ದ ಪೈಥಾನ್​ ಗ್ರಾಮದ ಪೈಥಾನಿ ಸೀರೆ ಸಾಕಷ್ಟು ಗಮನ ಸೆಳೆದಿದೆ.

ಸಿನಿಮಾದ ವಿಶೇಷ ಕಾರ್ಯಕ್ರಮದಲ್ಲಿ ಭಾಗಿಯಾಗಲು ಕಂಗನಾ ಅವರು ಮಹಾರಾಷ್ಟ್ರದ ಮರಾಠವಾಡದ ಸಂಭಾಜಿನಗರ ಜಿಲ್ಲೆಯಲ್ಲಿರುವ ಪೈಥಾನ್​ ಪಟ್ಟಣದಲ್ಲಿ ಹುಟ್ಟಿಕೊಂಡ ಪೈಥಾನಿ ಸೀರೆ ಧರಿಸಿದ್ದರು. ಇದಕ್ಕೆ 2 ಸಾವಿರ ವರ್ಷಗಳಿಗೂ ಹೆಚ್ಚು ಇತಿಹಾಸವಿದೆ.

ಕಂಗನಾ ತೊಟ್ಟ ಸೀರೆಯಲ್ಲಿ ಮಹಾರಾಷ್ಟ್ರದ ಶ್ರೀಮಂತ ಸಾಂಸ್ಕೃತಿಕ ಜವಳಿ ಪರಂಪರೆ ಪ್ರತಿನಿಧಿಸುವ ರೇಷ್ಮೆ ಹಾಗೂ ಚಿನ್ನ ಹಳದಿ ಬಣ್ಣಗಳುಳ್ಳ ಸೀರೆಯಾಗಿದೆ. ಅಂಚಿನಲ್ಲಿ ಚಿನ್ನದಿಂದ ನೇಯ್ದ ಜರಿಗಳು, ಅಲ್ಲಲ್ಲಿ ನವಿಲಿನ್ನು ನೇಯ್ದಿರುವ ಚಿತ್ತಾರ ಸೀರೆಗೆ ಮತ್ತಷ್ಟು ಹೊಳಪು ಕೊಟ್ಟಿದೆ,

ಸಾಮಾನ್ಯವಾಗಿ ಮರಾಠಿ ಮಹಿಳೆಯರು ಮೂಗಿಗೆ ನತ್ತು, ಕೆಂಪು ಅರ್ಧ ಚಂದ್ರನ ಬಿಂದಿ ಧರಿಸುತ್ತಾರೆ. ಕಂಗನಾ ಅವರು ಸಹ ಥೇಟ್​ ಹಾಗಯೇ ಮೇಕಪ್​ ಮಾಡಿಕೊಂಡು, ಕೈಗೆ ಒಂದಷ್ಟು ಗೋಲ್ಡ್​ ಬಣ್ಣದ ಉಂಗುರಗಳನ್ನು ತೊಟ್ಟು ಮರಾಠಿ ಹೆಣ್ಣಿನಂತೆ ಕಂಗೊಳಿಸಿದರು.

2008ರಲ್ಲಿ ಮುಂಬೈನಲ್ಲಿ ಉಗ್ರರು ನಡೆಸಿದ್ದ ದಾಳಿಯನ್ನಾಧರಿಸಿ ಸಿನಿಮಾ ಮಾಡಲಾಗಿದೆ ಎನ್ನಲಾಗಿದೆ. ಆ ರಾತ್ರಿ ತಮ್ಮ ಪ್ರಾಣವನ್ನು ಪಣಕ್ಕಿಟ್ಟು 400 ಕ್ಕೂ ಹೆಚ್ಚು ರೋಗಿಗಳನ್ನು ಕಾಪಾಡಿಕೊಂಡ ನರ್ಸ್​​ಗಳನ್ನು ಆಧರಿಸಿ ಸಿನಿಮಾ ಮಾಡಲಾಗಿದೆ ಎನ್ನಲಾಗುತ್ತಿದೆ.