ಈ ಐದು ಹವ್ಯಾಸಗಳನ್ನು ಬಿಟ್ಟರೆ ಬೆನ್ನುನೋವು ಮಂಗಮಾಯ!

ಇಂದು ವಯಸ್ಸಿನ ಭೇದವಿಲ್ಲದೆ ಬಹುತೇಕ ಎಲ್ಲರನ್ನೂ ಕಾಡುವ ಬೆನ್ನು ನೋವಿಗೆ ನಮ್ಮ ದಿನನಿತ್ಯದ ಕೆಲವು ಕೆಟ್ಟ ಅಭ್ಯಾಸಗಳೇ ಮುಖ್ಯ ಕಾರಣ. ನಿಮ್ಮ ದಿನಚರಿಯಿಂದ ತಪ್ಪಾದ ಭಂಗಿಯಲ್ಲಿ ಕೂರುವುದು, ವ್ಯಾಯಾಮದ ಕೊರತೆ ಸೇರಿದಂತೆ ಈ 5 ಅಭ್ಯಾಸಗಳನ್ನು ಇಂದೇ ಕೈಬಿಟ್ಟರೆ, ಬೆನ್ನು ನೋವಿನ ಸಮಸ್ಯೆಯಿಂದ ಶಾಶ್ವತ ಮುಕ್ತಿ ಪಡೆಯಬಹುದು.

ಇತ್ತೀಚಿನ ದಿನಗಳಲ್ಲಿ ಕಂಪ್ಯೂಟರ್, ಲ್ಯಾಪ್‌ಟಾಪ್ ಅಥವಾ ಮೊಬೈಲ್ ಬಳಸುವಾಗ ಗೂನು ಬೆನ್ನು ಮಾಡಿ ಕೂರುವುದು ಎಲ್ಲರ ಅಭ್ಯಾಸವಾಗಿದೆ. ಕೂರುವಾಗ ಯಾವಾಗಲೂ ಬೆನ್ನುಮೂಳೆಯನ್ನು ನೇರವಾಗಿ ಇಡಬೇಕು. ಸೋಫಾ ಅಥವಾ ಚೇರ್ ಮೇಲೆ ಜಾರಿ ಕೂರಬೇಡಿ. ಪ್ರತಿ 30 ರಿಂದ 40 ನಿಮಿಷಗಳಿಗೊಮ್ಮೆ ಎದ್ದು ಸ್ವಲ್ಪ ದೂರ ನಡೆಯುವ ಅಭ್ಯಾಸ ಮಾಡಿಕೊಳ್ಳಿ.

ಐಟಿ ಉದ್ಯೋಗಿಗಳು ಅಥವಾ ಒಂದೇ ಕಡೆ ಗಂಟೆಗಟ್ಟಲೆ ಕೂತು ಕೆಲಸ ಮಾಡುವವರಲ್ಲಿ ಬೆನ್ನುಮೂಳೆಯ ಮೇಲಿನ ಒತ್ತಡ ಹೆಚ್ಚಾಗಿ ಬೆನ್ನು ನೋವು ಕಾಣಿಸಿಕೊಳ್ಳುತ್ತದೆ. ಕೆಲಸದ ನಡುವೆ ಸಣ್ಣ ಬ್ರೇಕ್ ತಗೆದುಕೊಳ್ಳಿ.

ನೆಲದ ಮೇಲಿರುವ ಭಾರವಾದ ವಸ್ತುಗಳನ್ನು ಎತ್ತುವಾಗ ನೇರವಾಗಿ ಸೊಂಟವನ್ನು ಬಗ್ಗಿಸಿ ಎತ್ತುವುದರಿಂದ ಬೆನ್ನಿನ ಸ್ನಾಯುಗಳ ಮೇಲೆ ಹಠಾತ್ ಒತ್ತಡ ಬಿದ್ದು, ನರಗಳು ಜಖಂಗೊಳ್ಳಬಹುದು. ಭಾರವಾದ ವಸ್ತುಗಳನ್ನು ಎತ್ತುವಾಗ ಮೊದಲು ಮಂಡಿಯೂರಿ ಕುಳಿತುಕೊಂಡು ವಸ್ತುವನ್ನು ದೇಹಕ್ಕೆ ಹತ್ತಿರವಾಗಿ ಹಿಡಿದು, ಕಾಲಿನ ಬಲದಿಂದ ಮೇಲೆ ಏಳಬೇಕು. ನೇರವಾಗಿ ಸೊಂಟ ಬಗ್ಗಿಸಬಾರದು.

ಯಾವುದೇ ದೈಹಿಕ ಶ್ರಮ ಇಲ್ಲದಿರುವುದು ಅಥವಾ ವ್ಯಾಯಾಮ ಮಾಡದೆ ಇರುವುದರಿಂದ ಬೆನ್ನಿನ ಮತ್ತು ಹೊಟ್ಟೆಯ ಸ್ನಾಯುಗಳು ದರ್ಬಲಗೊಳ್ಳುತ್ತವೆ. ಸ್ನಾಯುಗಳು ದುರ್ಬಲವಾದಾಗ ಬೆನ್ನುಮೂಳೆಯನ್ನು ಸರಿಯಾಗಿ ಹಿಡಿದಿಡಲು ಸಾಧ್ಯವಾಗದೆ ನೋವು ಶುರುವಾಗುತ್ತದೆ.

ಅತಿಯಾಗಿ ಮೆತ್ತಗಿರುವ ಹಾಸಿಗೆಯ ಮೇಲೆ ಮಲಗುವುದರಿಂದ ಬೆನ್ನುಮೂಳೆಯ ನೈಸರ್ಗಿಕ ಆಕಾರವು ಹದಗೆಡುತ್ತದೆ. ಹಾಗೆಯೇ ಬೋರಲಾಗಿ ಮಲಗುವುದರಿಂದಲೂ ಬೆನ್ನಿನ ಮೇಲೆ ಒತ್ತಡ ಬೀಳುತ್ತದೆ. ಬೆನ್ನುಮೂಳೆಗೆ ಸರಿಯಾದ ಸಪೋರ್ಟ್ ನೀಡುವ ಮಧ್ಯಮ ಗಾತ್ರದ ಗಟ್ಟಿ ಹಾಸಿಗೆಯನ್ನು ಬಳಸಿ. ಮಲಗುವಾಗ ಮಂಡಿಗಳ ಮಧ್ಯೆ ಒಂದು ಸಣ್ಣ ದಿಂಬನ್ನು ಇಟ್ಟುಕೊಳ್ಳುವುದರಿಂದ ಬೆನ್ನು ನೋವು ಬರದಂತೆ ತಡೆಯಬಹುದು.