KR ಮಾರುಕಟ್ಟೆಯಲ್ಲಿ ಹೂ ಖರೀದಿ ಭರಾಟೆ

ವರಮಹಾಲಕ್ಷ್ಮಿ ಹಬ್ಬಕ್ಕೆ ದಿನಗಣನೆ ಶುರುವಾಗಿದೆ. ಹೀಗಾಗಿ ಎರಡು ದಿನಕ್ಕೂ ಮುನ್ನವೇ ಕೆ ಆರ್​ ಮಾರುಕಟ್ಟೆಯಲ್ಲಿ ಹೂ ಹಣ್ಣು, ಕಾಯಿ ಖರೀದಿ ಭರಾಟೆ ಜೋರಾಗಿ ನಡೆಯುತ್ತಿದೆ.

ಶುಕ್ರವಾರ ಇರುವ ವರಮಹಾಲಕ್ಷ್ಮಿ ಹಬ್ಬಕ್ಕಾಗಿ, ಬುಧವಾರ ಮತ್ತು ಗುರುವಾರ ಕೆಆರ್​ ಮಾರುಕಟ್ಟೆಯಲ್ಲಿ ಜನ ಹೆಚ್ಚು ಇರುವ ಕಾರಣ ಇಂದಿನಿಂದಲೇ ಹೂವು, ಕಾಯಿ, ಹಣ್ಣ ಖರೀದಿ ಮಾಡಲು ಜನರು ಮುಂದಾಗಿದ್ದಾರೆ.

ಕೆಆರ್​ ಮಾರ್ಕೆಟ್​​​​ ಜನರಿಂದ ಹಾಗೂ ಹೂಗಳ ರಾಶಿಯಿಂದ ಕೂಡಿರುವ ದೃಶ್ಯಾವಳಿಗಳು ಜನರ ಮೊಬೈಲ್​ ಹಾಗೂ ಸೋಶಿಯಲ್​ ಮೀಡಿಯಾದಲ್ಲಿ ವೈರಲ್ ಆಗಿದೆ.

ಸಾಮಾನ್ಯವಾಗಿ ಲಕ್ಷ್ಮಿಗೆ ಇಡುವ ಕಮಲದ ಮೊಗ್ಗು, ಸೇವಂತಿಗೆ, ಚೆಂಡು ಹೂಗಳನ್ನು ಇಡಲಾಗಿದೆ. ಹಳದಿ ಮತ್ತು ಕೇಸರಿ ಬಣ್ಣದ ಚೆಂಡು ಹೂಗಳನ್ನು ದಿಂಡಾಗಿ ಕಟ್ಟಿ ಹಾವಿನಂತೆ ಸುತ್ತಿಟ್ಟು, ಬರುವ ಗ್ರಾಹಕರತ್ತ ಚೌಕಾಸಿ ಮಾಡಿ ಹೂವು ಕೊಡುತ್ತಿರುವ ದೃಶ್ಯಗಳು ಕಣ್ಸೆಳೆಯುವಂತೆ ಮಾಡುತ್ತಿದೆ.

ಆಗಸ್ಟ್​ನಲ್ಲಿ ಸಾಲು ಸಾಲು ಹಿಂದೂ ಹಬ್ಬಗಳು ಇವೆ. ವರ ಮಹಾಲಕ್ಷ್ಮಿ ಹಬ್ಬವನ್ನು ಈ ವಾರದ ಶುಕ್ರವಾರ ಮತ್ತು ಮುಂದಿನ ವಾರವೂ ಮಾಡುವುದರಿಂದ ಹೂವಿನ ಖರೀದಿ ಇರುತ್ತದೆ. ಅಷ್ಟೇ ಅಲ್ಲೇ ಇದೇ ತಿಂಗಳಲ್ಲಿ ಶ್ರೀ ಕೃಷ್ಣ ಜನ್ಮಾಷ್ಟಮಿ , ಓಣಂ ಹಬ್ಬ ಇರುವುದರಿಂದ ಹೂ ಮಾರಾಟಗಾರರಿಗೆ ಮತ್ತು ಬೆಳೆಗಾರರಿಗೆ ಅಧಿಕ ಲಾಭ ಸಿಗುವ ಸಾಧ್ಯತೆ ಇದೆ.

ಶ್ರಾವಣ ಮಾಸದಲ್ಲಿ ಬರುವ ಈ ವರಮಹಾಲಕ್ಷ್ಮಿ ಹಬ್ಬವನ್ನು ಪೂಜೆ ಮಾಡುವುದು ಅಷ್ಟಲಕ್ಷ್ಮಿಯರನ್ನು ಪೂಜೆ ಮಾಡಿದಂತೆ ಎನ್ನಲಾಗಿದೆ. ಆದಿ ಲಕ್ಷ್ಮಿ, ಧಾನ್ಯ ಲಕ್ಷ್ಮಿ, ಐಶ್ವರ್ಯ ಲಕ್ಷ್ಮಿ, ಸಂತಾನ ಲಕ್ಷ್ಮಿ, ಗಜಲಕ್ಷ್ಮಿ, ವೀರಲಕ್ಷ್ಮಿ, ವಿಜಯಲಕ್ಷ್ಮಿ, ವಿದ್ಯಾಲಕ್ಷ್ಮಿಯರನ್ನು ಪೂಜಿಸಿದಂತೆ ಎನ್ನಲಾಗಿದೆ.