ನಿಮ್ಮ ಫ್ರಿಡ್ಜ್‌ನಲ್ಲಿ ಈ ಪದಾರ್ಥಗಳಿವೆಯೇ? ಎಚ್ಚರ..

ಆಹಾರ ಪದಾರ್ಥಗಳು ದೀರ್ಘಕಾಲ ತಾಜಾವಾಗಿರಲಿ ಎಂದು ನಾವು ಫ್ರಿಡ್ಜ್ ಬಳಸುತ್ತೇವೆ. ಆದರೆ ಆಹಾರ ತಜ್ಞರ ಪ್ರಕಾರ, ದಿನನಿತ್ಯದ ಕೆಲವು ಪದಾರ್ಥಗಳನ್ನು ಫ್ರಿಡ್ಜ್‌ನಲ್ಲಿಟ್ಟರೆ ಅವು ವಿಷಕಾರಿಯಾಗಬಹುದು ಅಥವಾ ತಮ್ಮ ನೈಸರ್ಗಿಕ ಗುಣಗಳನ್ನು ಕಳೆದುಕೊಳ್ಳಬಹುದು.

ಟೊಮೆಟೊಗಳನ್ನು ಫ್ರಿಡ್ಜ್‌ನಲ್ಲಿಟ್ಟರೆ ಅವುಗಳ ನೈಸರ್ಗಿಕ ಸುವಾಸನೆ ಮತ್ತು ರುಚಿ ಕಡಿಮೆಯಾಗುತ್ತದೆ. ತಂಪಾದ ಗಾಳಿಯು ಟೊಮೆಟೊದ ಹೊರಪೊರೆಯನ್ನು ಹಾನಿಗೊಳಿಸಿ ಅದನ್ನು ಮೆತ್ತಗಾಗಿಸುತ್ತದೆ.

ತಂಪಾದ ತಾಪಮಾನವು ಆಲೂಗಡ್ಡೆಯಲ್ಲಿರುವ ಪಿಷ್ಟವನ್ನು ಸಕ್ಕರೆಯಾಗಿ ಪರಿವರ್ತಿಸುತ್ತದೆ. ಇಂತಹ ಆಲೂಗಡ್ಡೆಯನ್ನು ಬೇಯಿಸಿದಾಗ ಅದು ವಿಚಿತ್ರ ರುಚಿ ನೀಡುವುದಲ್ಲದೆ, ಅಕ್ರಿಲಾಮೈಡ್ ಎಂಬ ಹಾನಿಕಾರಕ ರಾಸಾಯನಿಕ ಬಿಡುಗಡೆ ಮಾಡಿ ಆರೋಗ್ಯಕ್ಕೆ (ಕ್ಯಾನ್ಸರ್ ಅಪಾಯ) ಹಾನಿ ಮಾಡಬಹುದು.

ಈರುಳ್ಳಿಯನ್ನು ಫ್ರಿಡ್ಜ್‌ನಲ್ಲಿಟ್ಟರೆ ಅದರ ತೇವಾಂಶದಿಂದಾಗಿ ಅದು ಮೆತ್ತಗಾಗಿ ಬೂಸ್ಟ್ ಬರಲು ಆರಂಭವಾಗುತ್ತದೆ. ಬೆಳ್ಳುಳ್ಳಿ ಕೂಡ ಫ್ರಿಡ್ಜ್‌ನಲ್ಲಿ ಬೇಗನೆ ಮೊಳಕೆಯೊಡೆದು ತನ್ನ ಘಾಟು ಮತ್ತು ರುಚಿಯನ್ನು ಕಳೆದುಕೊಳ್ಳುತ್ತದೆ.

ಬಾಳೆಹಣ್ಣು ಉಷ್ಣವಲಯದ ಬೆಳೆಯಾದ್ದರಿಂದ ಅದಕ್ಕೆ ಶೀತ ತಾಪಮಾನ ಒಗ್ಗುವುದಿಲ್ಲ. ಫ್ರಿಡ್ಜ್‌ನಲ್ಲಿಟ್ಟರೆ ಅದರ ಸಿಪ್ಪೆ ಬೇಗನೆ ಕಪ್ಪಾಗುತ್ತದೆ ಮತ್ತು ಹಣ್ಣು ಸರಿಯಾಗಿ ಹಣ್ಣಾಗುವುದಿಲ್ಲ.

ಜೇನುತುಪ್ಪಕ್ಕೆ ನೈಸರ್ಗಿಕವಾಗಿ ಕೆಡದ ಗುಣವಿದೆ. ಇದನ್ನು ಫ್ರಿಡ್ಜ್‌ನಲ್ಲಿಟ್ಟರೆ ಅದು ಸ್ಫಟಿಕೀಕರಣಗೊಂಡು ಗಟ್ಟಿಯಾಗುತ್ತದೆ ಮತ್ತು ಬಳಸಲು ಕಷ್ಟವಾಗುತ್ತದೆ.