ನಗುವಲ್ಲೇ ಮೋಡಿ ಮಾಡಿದ ಅನು!

ಕೇರಳದ ಇರಿಂಜಲಕುಡದಲ್ಲಿ 1996ರ ಫೆಬ್ರವರಿ 18ರಂದು ಜನಿಸಿದ ಅನುಪಮಾ ಪರಮೇಶ್ವರನ್, 2015ರಲ್ಲಿ ಬಿಡುಗಡೆಯಾದ ‘ಪ್ರೇಮಂ’ ಮಲಯಾಳಂ ಸಿನಿಮಾದ ಮೂಲಕ ಚಿತ್ರರಂಗಕ್ಕೆ ಕಾಲಿಟ್ಟರು. ಮೇರಿ ಜಾರ್ಜ್ ಪಾತ್ರದಲ್ಲಿ ಕಾಣಿಸಿಕೊಂಡ ಅವರು ಮೊದಲ ಸಿನಿಮಾದಲ್ಲೇ ಪ್ರೇಕ್ಷಕರ ಗಮನ ಸೆಳೆದರು.

ಪ್ರೇಮಂ ಬಳಿಕ ತೆಲುಗಿನಲ್ಲಿ ಅ ಆ, ಶತಮಾನಂ ಭವತಿ, ಉನ್ನದಿ ಒಕಟೇ ಜಿಂದಗಿ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿ ಜನಪ್ರಿಯತೆ ಗಳಿಸಿದರು. 2022ರ ‘ಕಾರ್ತಿಕೇಯ 2’ ಸಿನಿಮಾ ಅವರ ವೃತ್ತಿಜೀವನಕ್ಕೆ ದೊಡ್ಡ ತಿರುವು ನೀಡಿತು. ಈ ಸಿನಿಮಾದ ಯಶಸ್ಸಿನ ಬಳಿಕ ದಕ್ಷಿಣ ಭಾರತದಲ್ಲಿ ಅವರ ಹೈಪ್ ಮತ್ತಷ್ಟು ಹೆಚ್ಚಾಯಿತು.

ಅನುಪಮಾ ಪರಮೇಶ್ವರನ್ ‘ನಟಸಾರ್ವಭೌಮ’ ಸಿನಿಮಾದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದರು. ಪುನೀತ್ ರಾಜ್‌ಕುಮಾರ್ ಅಭಿನಯದ ಈ ಸಿನಿಮಾದಲ್ಲಿ ಅವರು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಕನ್ನಡ ಪ್ರೇಕ್ಷಕರಿಗೂ ಅನುಪಮಾ ಪರಿಚಿತರಾಗಲು ಈ ಸಿನಿಮಾ ಪ್ರಮುಖ ಕಾರಣವಾಯಿತು.

ಮಲಯಾಳಂ, ತೆಲುಗು, ತಮಿಳು ಮತ್ತು ಕನ್ನಡ ಸಿನಿಮಾಗಳಲ್ಲಿ ನಟಿಸಿರುವ ಅನುಪಮಾ, ದಕ್ಷಿಣ ಭಾರತದ ಬಹುಭಾಷಾ ನಟಿಯಾಗಿ ಗುರುತಿಸಿಕೊಂಡಿದ್ದಾರೆ. ಕಾರ್ತಿಕೇಯ 2, 18 ಪೇಜಸ್’, ‘ಟಿಲ್ಲು ಸ್ಕ್ವೇರ್’, ‘ಡ್ರ್ಯಾಗನ್’ ಸೇರಿದಂತೆ ಹಲವು ಸಿನಿಮಾಗಳು ಅವರ ಜನಪ್ರಿಯತೆಯನ್ನು ಹೆಚ್ಚಿಸಿವೆ. ವಿವಿಧ ಪ್ರಶಸ್ತಿ ಸಮಾರಂಭಗಳಲ್ಲಿ ಅವರ ಅಭಿನಯ ಗುರುತಿಸಲ್ಪಟ್ಟಿದೆ.

ಅನುಪಮಾ ತಮ್ಮ ವೈಯಕ್ತಿಕ ಜೀವನವನ್ನು ಹೆಚ್ಚು ಖಾಸಗಿಯಾಗಿಯೇ ಇಟ್ಟುಕೊಂಡಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಸಿನಿಮಾ ಕೆಲಸಗಳು, ಪ್ರವಾಸ, ಫೋಟೋಶೂಟ್ ಹಾಗೂ ವೈಯಕ್ತಿಕ ಕ್ಷಣಗಳನ್ನು ಹಂಚಿಕೊಳ್ಳುತ್ತಾರೆ. ಅವರ ಸರಳ ನಗು, ವಿಭಿನ್ನ ಫ್ಯಾಷನ್ ಶೈಲಿ ಮತ್ತು ಸಹಜ ಸೌಂದರ್ಯಕ್ಕೆ ಅಪಾರ ಅಭಿಮಾನಿಗಳಿದ್ದಾರೆ.

ಸಿನಿಮಾ ಆಯ್ಕೆಯಲ್ಲಿ ವಿಭಿನ್ನತೆ ತೋರಿಸುತ್ತಿರುವ ಅನುಪಮಾ, ಮುಂದಿನ ದಿನಗಳಲ್ಲೂ ಹಲವು ಭಾಷೆಗಳ ಚಿತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ‘ಭೋಗಿ’, ‘ಮರೀಚಿಕಾ’ ಹಾಗೂ ‘ಎಲ್ ಕ್ಲಾಸಿಕೋ’ ಸೇರಿದಂತೆ ಮುಂಬರುವ ಸಿನಿಮಾಗಳ ಮೂಲಕ ಮತ್ತಷ್ಟು ಗಮನ ಸೆಳೆಯುವ ನಿರೀಕ್ಷೆಯಿದೆ.