ತಮಿಳುನಾಡು ವಿಧಾನಸಭೆ ಚುನಾವಣೆ; ಮತ ಚಲಾಯಿಸಿದ ಕಾಲಿವುಡ್​ ಸ್ಟಾರ್ಸ್​ ಇವ್ರು

ತಮಿಳುನಾಡಿನಲ್ಲಿ ಇಂದು(ಏ.23)ರಂದು ಮತದಾನ ಕಾರ್ಯ ಚುರುಕಾಗಿ ನಡೆಯುತ್ತಿದೆ. ಮುಂಜಾನೆ 7ಗಂಟೆಯಿಂದ ಪೊಲೀಸ್​ ಬಿಗಿ ಭದ್ರತೆಯೊಂದಿಗೆ ಮತದಾನ ಆರಂಭವಾಗಿದೆ. 234 ಸದಸ್ಯ ಬಲದ ತಮಿಳುನಾಡು ಚುನಾವಣೆಗೆ ಮತದಾನ ಕಾರ್ಯ ಒಂದೇ ದಿನ ನಡೆಯಲಿದ್ದು, ಮೇ.4ಕ್ಕೆ ಪಶ್ಚಿಮ ಬಂಗಾಳ ಮತ್ತು ತಮಿಳುನಾಡಿನ ಮತ ಎಣಿಕೆ ಕಾರ್ಯ ನಡೆಯಲಿದೆ.

ನಟ ಅಜಿತ್​ ಅವರು ತಮಿಳು ನಾಡಿನ ವಿಧಾನಸಭಾ ಚುನಾವಣೆಗೆ ಮತದಾನ ಮಾಡಿದ ಮೊದಲ ಸೆಲಬ್ರೆಟಿ. ತಿರುವನ್ಮಿಯೂರಿನಲ್ಲಿ ಮತ ಚಲಾಯಿಸಿ ಮಾತನಾಡಿದ ಅವರು, ಮನೆಯಲ್ಲಿ ಸುಮ್ಮನೆ ಕೂರಬೇಡಿ ರಾಜ್ಯದ ಅಭಿವೃದ್ಧಿಗೆ ನಿಮ್ಮ ವೋಟು ಮುಖ್ಯ ಎಂದು ಜನರಲ್ಲಿ ಮನವಿ ಮಾಡಿಕೊಂಡರು.

ಸೂಪರ್​ ಸ್ಟಾರ್​ ರಜನೀಕಾಂತ್​ ಅವರು ಚೆನ್ನೈನ ಸ್ಟೆಲ್ಲಾ ಮೇರಿ ಶಾಲೆಯಲ್ಲಿ ಸಾಮನ್ಯ ಜನರಂತೆ ಬಂದು ವೋಟ್ ಹಾಕಿದರು.

ಚೆನ್ನೈನ ತೇನಾಂಪೇಟೆಯ ಎಲ್ಸನ್​ ರಸ್ತೆಯಲ್ಲಿರುವ ಚೆನ್ನೈನ ಹೈಸ್ಕೂಲ್​ನಲ್ಲಿ ನಟ ಮತ್ತು ಸಂಸದ ಕಮಲ್ ಹಾಸನ್ ಮತ್ತು ಅವರ ಪುತ್ರಿ ನಟಿ ಶ್ರುತಿ ಹಾಸನ್ ಒಟ್ಟಿಗೆ ಮತ ಚಲಾಯಿಸಿದರು. ಕಮಲ್​ ಹಾಸನ್​ ಶ್ರುತಿ ಆಗಮಿಸುತ್ತಲೇ ಜನಸಂದಣಿ ಹೆಚ್ಚಾಗಿತ್ತು. ಗುಂಪು ಚದುರಿಸಲು ಪೊಲೀಸರು ಪರದಾಡಿದರು.

ನಟ ಮತ್ತು ಟಿವಿಕೆಯ ಸಂಸ್ಥಾಪಕ ವಿಜಯ್​ ಅವರು ಜನಜಂಗಳಿ ಮಧ್ಯೆಯೂ ನೀಲಂಗರೈನಲ್ಲಿ ಮತ ಚಲಾಯಿಸಿದರು. ಅವರ ಭದ್ರತೆಗಾಗಿ ಸಾಕಷ್ಟು ಪೊಲೀಸರು ಆಗಮಿಸಿದ್ದರು. ವಿಜಯ್​ ಅವರು ತಿರುಚಿರಾಪಳ್ಳಿ ಪೂರ್ವ ಮತ್ತು ಪೆರಂಬೂರು ಕ್ಷೇತ್ರಗಳಿಂದ ಸ್ಪರ್ಧಿಸುತ್ತಿದ್ದಾರೆ.

ನಟ ವಿಜಯ್ ಸೇತುಪತಿ ಚೆನ್ನೈನ ಮತದಾನ ಕೇಂದ್ರದಲ್ಲಿ ಮತ ಚಲಾಯಿಸಿದರು. ಜನ ದಟ್ಟಣೆ ಮಧ್ಯೆ ಮಾತನಾಡಿದ ಅವರು, ಎಲ್ಲರೂ ನಿಮ್ಮ ಮತ ಚಲಾಯಿಸಿ, ಇದು ನಮ್ಮ ಮುಖ್ಯ ಜವಾಬ್ದಾರಿ ಎಂದು ಹೇಳಿದರು.

ನಟಿ ತ್ರಿಷಾ ತಮ್ಮ ತಾಯಿ ಉಮಾ ಅವರೊಂದಿಗೆ ಆಗಮಿಸಿ ಅಭಿರಾಮಪುರಂನ ಸೇಂಟ್ ಫ್ರಾನ್ಸಿಸ್ ಜೇವಿಯರ್ ಮಿಡಲ್ ಶಾಲೆಯಲ್ಲಿ ಬೆಳಿಗ್ಗೆ 11 ಗಂಟೆಗೆ ಮತ ಚಲಾಯಿಸಿದರು.

ಮ್ಯೂಸಿಕ್​ ಮಾಂತ್ರಿಕ ಇಳಯರಾಜ ಅವರು, ಚೆನ್ನೈನ ಮತದಾನ ಕೇಂದ್ರಕ್ಕೆ ಆಗಮಿಸಿ ತಮ್ಮ ವೋಟ್​ ಚಲಾಯಿಸಿದರು.

ನಟ ಧನುಷ್​ ಅವರು ಚೆನ್ನೈನ ಕಾಮರಾಜರ್ ರಸ್ತೆ ಕಾರ್ಪೊರೇಷನ್​ನ ಮತದಾನ ಕೇಂದ್ರಕ್ಕೆ ಆಗಮಿಸಿ ತಮ್ಮ ಮತವನ್ನು ಚಲಾಯಿಸಿದರು.

ಕ್ರಿಕೆಟಿಗ ರವಿಚಂದ್ರನ್ ಅಶ್ವಿನ್ ಮತ್ತು ಅವರ ಪತ್ನಿ ಪ್ರೀತಿ ನಾರಾಯಣನ್ ಅವರೊಂದಿಗೆ ಆಗಮಿಸಿ ಚೆನ್ನೈನ ಮತದಾನ ಕೇಂದ್ರದಲ್ಲಿ ವೋಟ್ ಮಾಡಿದರು. ಈ ವೇಳೆ ಮಾತನಾಡಿದ ಅವರು ತಮಿಳುನಾಡಿನಲ್ಲಿ ಇದು ಬಹಳ ಮುಖ್ಯವಾದ ಚುನಾವಣೆ. ನಾನು ನನ್ನ ಹಕ್ಕು ಚಲಾಯಿಸಿದ್ದೇನೆ. ನೀವು ಸಹ ನಿಮ್ಮ ಮತದಾನದ ಹಕ್ಕನ್ನು ಚಲಾಯಿಸಿ ಎಂದು ಕಿವಿಮಾತು ಹೇಳಿದರು.