ಪತಿ ಗೆಲುವಿಗೆ ಪತ್ನಿ ಪಾದಯಾತ್ರೆ

ಔರಾದ್: ಕಾಂಗ್ರೆಸ್ ಅಭ್ಯರ್ಥಿ ಈಶ್ವರ ಖಂಡ್ರೆ ಗೆಲುವಿಗಾಗಿ ಪತ್ನಿ ಡಾ.ಗೀತಾ ಮಂಗಳವಾರ ಪಟ್ಟಣದ ಅಮರೇಶ್ವರ ಸನ್ನಿಧಿಯಲ್ಲಿ ವಿಶೇಷ ಪೂಜೆ ಮತ್ತು ಪ್ರಾರ್ಥನೆ ಸಲ್ಲಿಸಿದರು. ನಂತರ ನೂರಾರು ಕಾರ್ಯಕರ್ತರೊಂದಿಗೆ ಪಾದಯಾತ್ರೆ ನಡೆಸಿ ಪತಿ ಪರವಾಗಿ ಮತಯಾಚಿಸಿದರು.

ಔರಾದ್ ತಾಲೂಕಿನೊಂದಿಗೆ ನಮ್ಮ ಕುಟುಂಬ ಭಾವನಾತ್ಮಕ ಸಂಬಂಧ ಹೊಂದಿದೆ. ತಾಲೂಕಿನ ಜನಜೀವನ ಸುಧಾರಣೆಗೆ ಈಶ್ವರ ಖಂಡ್ರೆ ಕಾಳಜಿ ಹೊಂದಿದ್ದಾರೆ. ಔರಾದ್ ಮತ್ತು ಭಾಲ್ಕಿ ತಾಲೂಕು ಜನರ ಮಧ್ಯೆ ಖಂಡ್ರೆಯವರಿಗೆ ಯಾವುದೇ ವ್ಯತ್ಯಾಸ ಕಾಣುವುದಿಲ್ಲ. ನಿಮ್ಮ ಮನೆ ಮಗನೆಂದು ತಿಳಿದು ಆಶೀರ್ವದಿಸಿ ಎಂದು ಡಾ.ಗೀತಾ ಮನವಿ ಮಾಡಿದರು.

ಖಂಡ್ರೆಯವರು ಎಲ್ಲೇ ಇದ್ದರೂ, ನಿಮ್ಮ ಯಾವುದೇ ಸಮಸ್ಯೆಗೆ ನಾನು ಪರಿಹರಿಸಲು ಪ್ರಯತ್ನಿಸುವೆ. ನಿಮ್ಮ ಕಷ್ಟ-ಸುಖದ ಚಿಂತೆ ನನಗೆ ಬಿಡಿ. ನಾನು ಸದಾ ನಿಮ್ಮೊಂದಿಗೆ ಇದ್ದೇನೆ. ಖಂಡ್ರೆಯವರನ್ನು ಗೆಲ್ಲಿಸಿದರೆ ನಿಮ್ಮ ಋಣ ತೀರಿಸುವ ಬದ್ಧತೆ ನಮ್ಮಲ್ಲಿದೆ ಎಂದರು.

ಕಾಂಗ್ರೆಸ್ ತಾಲೂಕು ಅಧ್ಯಕ್ಷ ರಾಜಕುಮಾರ ಹಲಬುರ್ಗೆ, ಮುಖಂಡರಾದ ವಿಜಯಕುಮಾರ ಕೌಡಾಳ್, ಬಸವರಾಜ ದೇಶಮುಖ, ಪಪ್ಪು ಪಾಟೀಲ್ ಖಾನಾಪುರ, ರಾಮಣ್ಣ ಒಡೆಯರ್, ಬಾಬುರಾವ ತಾರೆ, ಡಾ.ಫಯಾಜ್ ಅಲಿ, ಡಾ.ಶಂಕರರಾವ ದೇಶಮುಖ, ಡಾ.ಮಹೇಶ ಫುಲಾರಿ, ಶರಣಪ್ಪ ಪಾಟೀಲ್, ವಿದ್ಯಾಸಾಗರ ಮಳ್ಳೆ, ರಾಜಕುಮಾರ ಎಡವೆ, ಸುನೀಲ ಮಿತ್ರಾ, ಸತೀಶ ನಿರ್ಮಳೆ, ವೈಜಿನಾಥ ಒಡೆಯರ್, ಚನ್ನಪ್ಪ ಉಪ್ಪೆ, ಮುಕ್ರಮ್ ಬಾಗವಾನ್, ಅಬ್ದುಲ್ ರಹೀಮ ಸಾಬ್ ಇದ್ದರು