ಬೆಂಗಳೂರು: ‘ಒಳಗೆ ಪ್ರವೇಶಿಸುತ್ತಿದ್ದಂತೆ ಹಿಂಡು ಹಿಂಡು ಜನ, ಅವರ ಕೈಯಲ್ಲಿ ಪಿಸ್ತೂಲ್-ಬಂದೂಕು, ಉಸಿರುಗಟ್ಟಿಸುವ ವಾತಾವರಣ, ಮಂದ ಬೆಳಕು, ಉರಿಯುವ ದೊಂದಿ, ಬಂದೂಕಿನಿಂದ ಸಿಡಿಯುವ ಬೆಂಕಿ ಕಿಡಿ..’ ಇದೆಲ್ಲ ಕಂಡುಬಂದಿದ್ದು ಬೆಂಗಳೂರಿನ ಮಾಗಡಿ ರಸ್ತೆಯಲ್ಲಿನ ಮಿನರ್ವ ಮಿಲ್ಸ್ನಲ್ಲಿ. ಅಷ್ಟಕ್ಕೂ ಇದಕ್ಕೆಲ್ಲ ಕಾರಣ, ಉಪ್ಪಿ-ಚಂದ್ರು.
ಹೌದು.. ಕಳೆದೊಂದು ವಾರದಿಂದ ರಿಯಲ್ ಸ್ಟಾರ್ ಉಪೇಂದ್ರ ಹಾಗೂ ಆರ್.ಚಂದ್ರು ಮಿನರ್ವ ಮಿಲ್ಸ್ ಅನ್ನು ತಮ್ಮ ‘ಕಬ್ಜ’ಕ್ಕೆ ತೆಗೆದುಕೊಂಡಿದ್ದಾರೆ. ಅರ್ಥಾತ್, ಆರ್. ಚಂದ್ರು ನಿರ್ವಣ-ನಿರ್ದೇಶನ ಹಾಗೂ ಉಪೇಂದ್ರ ಅಭಿನಯದಲ್ಲಿ ಮೂಡಿಬರುತ್ತಿರುವ ‘ಕಬ್ಜ’ ಸಿನಿಮಾದ ಚಿತ್ರೀಕರಣ ಮಿನರ್ವ ಮಿಲ್ಸ್ ನಲ್ಲಿ ನಡೆಯುತ್ತಿದ್ದು, ಅಲ್ಲಿ ಅದಕ್ಕೆಂದೇ ಪಬ್, ಮಟನ್ ಬಜಾರ್ನಂಥ ವಿಶೇಷವಾದ ಸೆಟ್ಗಳನ್ನು ಹಾಕಲಾಗಿದೆ. ಹಳೇ ಕಾಲದ ಭೂಗತ ಜಗತ್ತನ್ನು ನೆನಪಿಸುವ, ಆಗಿನ ಕಾಲದಲ್ಲಿದ್ದಂಥದ್ದೇ ಉಡುಪು ಧರಿಸಿ ರೌಡಿಗಳ ಗೆಟಪ್ನಲ್ಲಿರುವ ಕಲಾವಿದರ ತಂಡೋಪತಂಡದ ಮಧ್ಯೆ ವಿಶಿಷ್ಟ ಗೆಟಪ್ನಲ್ಲಿ ಭೂಗತ ದೊರೆಯಂತೆ ಕಾಣಿಸುವ ಪಾತ್ರದಲ್ಲಿ ಉಪೇಂದ್ರ ಅಭಿನಯದ ದೃಶ್ಯಗಳಿಗೆ ಚಂದ್ರು ಅಲ್ಲಿ ಆಕ್ಷನ್-ಕಟ್ ಹೇಳುತ್ತಿದ್ದಾರೆ. ಹೀಗೆ ವಿಭಿನ್ನವಾಗಿ ಚಿತ್ರೀಕರಣ ನಡೆಯುತ್ತಿರುವ ‘ಕಬ್ಜ’ ಸೆಟ್ಗೆ ಮಾಧ್ಯಮದವರನ್ನು ಆಹ್ವಾನಿಸಿದ್ದ ಚಂದ್ರು, ಜೂಜಿನ ಅಡ್ಡೆಯಂಥಿದ್ದ ಪಬ್ನಂಥ ಸೆಟ್ವೊಂದನ್ನು ತೋರಿಸಿ ಶೂಟಿಂಗ್ ಬಗ್ಗೆ ಮಾಹಿತಿ ಹಂಚಿಕೊಂಡರು.
‘ಇದು 1947ರ ನಂತರದಿಂದ 1980-90ರ ದಶಕದ ವರೆಗಿನ ಕಥೆ ಹೊಂದಿರುವುದರಿಂದ, ರೆಟ್ರೊ ಶೈಲಿಯಲ್ಲಿ ಚಿತ್ರೀಕರಿಸಬೇಕಾದ್ದರಿಂದ ವಿಭಿನ್ನವಾದ ಸೆಟ್ಗಳನ್ನು ಹಾಕಲಾಗಿದೆ. ಇಲ್ಲಿ 30-35 ದಿನಗಳ ಷೆಡ್ಯೂಲ್ ಹಾಕಿಕೊಳ್ಳಲಾಗಿದ್ದು, ಒಂದು ವಾರದಿಂದ ರಾತ್ರಿ ಹಗಲೆನ್ನದೆ ಶೂಟಿಂಗ್ ನಡೆಯುತ್ತಿದೆ. ರೆಟ್ರೊ ಕಥೆ ಆಗಿರುವುದರಿಂದ ಹೊರಾಂಗಣದಲ್ಲಿ ಶೂಟಿಂಗ್ ಮಾಡಿದರೆ ಸಹಜತೆ ಇರುವುದಿಲ್ಲ ಎಂಬ ಕಾರಣಕ್ಕೆ ಸೆಟ್ ಹಾಕಿಸಲಾಗಿದೆ’ ಎಂದರು ಚಂದ್ರು. ಕಲಾ ನಿರ್ದೇಶಕ ಶಶಿಕುಮಾರ್ ಈ ಸೆಟ್ಗಳನ್ನು ವಿನ್ಯಾಸ ಮಾಡಿದ್ದು, ರವಿವರ್ಮ ಸಾಹಸ ಸಂಯೋಜನೆಯಲ್ಲಿ ಫೈಟ್ ಸೀನ್ಸ್ ಚಿತ್ರೀಕರಿಸಿಕೊಳ್ಳಲಾಗುತ್ತಿದೆ. ನಟ ಉಪೇಂದ್ರ, ಜಾನ್ ಕೊಕೆನ್ ಮುಂತಾದವರು ಸೇರಿ ಹಲವರ ಅಭಿನಯದಲ್ಲಿ ಇಲ್ಲಿ ಶೂಟಿಂಗ್ ನಡೆಸಲಾಗುತ್ತಿದೆ ಎಂದರು.
ಒಂದೊಂದು ಎಪಿಸೋಡ್ ಕೂಡ ಅಪರೂಪದ ಅನುಭವ ನೀಡುತ್ತಿದೆ. ಈ ಶೂಟಿಂಗ್ ಕ್ಷಣಗಳನ್ನು ಅನುಭವಿಸುವುದೇ ದೊಡ್ಡ ಖುಷಿ. ಈ ಶೂಟಿಂಗ್ ನಾನು ‘ಓಂ’ ಸಿನಿಮಾ ಮಾಡುತ್ತಿದ್ದಾಗ ಸಿಕ್ಕ ಅನುಭವವನ್ನೇ ನೀಡುತ್ತಿದೆ.
| ಉಪೇಂದ್ರ ನಾಯಕ ನಟ
ಕನ್ನಡ ಚಿತ್ರರಂಗವನ್ನು ಈಗಾಗಲೇ ಹಲವರು ಒಂದೊಂದು ಹಂತಕ್ಕೆ ಕೊಂಡೊಯ್ದಿದ್ದಾರೆ. ಈ ಚಿತ್ರದ ಮೂಲಕ ನಾನೂ ಇಂಡಸ್ಟ್ರಿಯನ್ನು ಬೇರೆಯದೇ ಹಂತಕ್ಕೆ ಕೊಂಡೊಯ್ಯುವ ಕನಸು ಹೊಂದಿದ್ದೇನೆ. ಏಳು ಭಾಷೆಗಳಲ್ಲಿ ಮೂಡಿಬರಲಿರುವ ಈ ಪ್ಯಾನ್ ಇಂಡಿಯಾ ಸಿನಿಮಾ ಒಂದು ಮೈಲಿಗಲ್ಲು ಆಗಲಿದೆ.
| ಆರ್.ಚಂದ್ರು ನಿರ್ದೇಶಕ