ಈಜಲೆಂದು ತೆರಳಿ ಗೆಳೆಯರ ನಿರ್ಲಕ್ಷ್ಯದಿಂದ ಜಲಸಮಾಧಿಯಾದ ಯುವಕ; ಆತ ಮುಳುಗುತ್ತಿರುವುದನ್ನೇ ವಿಡಿಯೋ ಮಾಡಿಕೊಂಡ ಸ್ನೇಹಿತರು

ಕಲಬುರಗಿ: ಸ್ನೇಹಿತರೊಂದಿಗೆ ಸೇರಿ ಈಜಲೆಂದು ಹೋದ ಯುವಕ ಅದೇ ಸ್ನೇಹಿತರ ನಿರ್ಲಕ್ಷ್ಯದಿಂದ ಪ್ರಾಣ ಕಳೆದುಕೊಂಡ ದುರ್ಘಟಣೆ ಹೊರವಲಯ ರುಕ್ಮೋದ್ಸಿನ ತೋಲಾ ಸಮೀಪದ ಕಲ್ಲುಕಣಿಯಲ್ಲಿ ನಡೆದಿದೆ.

ಮಿಜಗುರಿ ಪ್ರದೇಶದ ನಿವಾಸಿ ಜಾಫರ್​ ಐಯೂಬ್​ (22) ಮೃತ. ಈತ ಮುಳುಗುತ್ತಿದ್ದರೆ ಅವನ ಸ್ನೇಹಿತರು ನೋಡುತ್ತ ನಿಂತಿದ್ದರು. ಅಷ್ಟೇಅಲ್ಲ ಅದರಲ್ಲಿ ಒಬ್ಬಾತನಂತೂ ಜಾಫರ್​ ಮುಳುಗುವುದರ ವಿಡಿಯೋ ಮಾಡಿದ್ದಾನೆ. ಮತ್ತೋರ್ವ ಸುಮ್ಮನೆ ದಡದ ಮೇಲೆ ನಿಂತಿದ್ದ.

ಜಾಫರ್​ ಹೇಗೋ ದಡದ ಸಮೀಪ ಬಂದು ತನ್ನನ್ನು ಎತ್ತುವಂತೆ ಸ್ನೇಹಿತರಿಗೆ ಕೈ ತೋರಿಸಿದ್ದಾನೆ. ಆದರೆ ದಡದಲ್ಲಿದ್ದ ಸ್ನೇಹಿತರು ಆ ಬಗ್ಗೆ ಲಕ್ಷ್ಯವನ್ನೇ ಕೊಡಲಿಲ್ಲ. ಸ್ನೇಹಿತರ ಕಣ್ಣೆದುರೇ ಜಾಫರ್​ ಜಲಸಮಾಧಿಯಾಗಿದ್ದಾನೆ. ಆತ ಮುಳುಗುತ್ತಿರುವ ದೃಶ್ಯಗಳು ಮೊಬೈಲ್​ನಲ್ಲಿ ಸೆರೆಯಾಗಿವೆ.

ಬಳಿಕ ಸ್ಥಳೀಯರು, ಪೊಲೀಸರು, ಅಗ್ನಿಶಾಮಕದಳದ ಸಿಬ್ಬಂದಿ ಯುವಕರು ಈಜಲೆಂದು ಹೋಗಿದ್ದ ಸ್ಥಳಕ್ಕೆ ತೆರಳಿದ್ದಾರೆ. ಶವ ಹೊರಗೆ ತೆಗೆಯಲಾಗಿದ್ದು, ಗ್ರಾಮೀಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.