ಮುಂಬೈ: ಕೆಲ ದಿನಗಳ ಹಿಂದಷ್ಟೇ ಪ್ರಕಟವಾದ 2019ನೇ ಸಾಲಿನ ಯುಪಿಎಸ್ಸಿ ಪರೀಕ್ಷಾ ಫಲಿತಾಂಶದಲ್ಲಿ 93ನೇ ರ್ಯಾಂಕ್ ಪಡೆದ ಬೆನ್ನಲ್ಲೇ ಪ್ರಸಿದ್ಧಿ ಪಡೆದಿರುವ ಮಿಸ್ ಇಂಡಿಯಾ ಫೈನಲಿಸ್ಟ್ ಐಶ್ವರ್ಯಾ ಶಿಯೋರನ್ ಇದೀಗ ಪೊಲೀಸ್ ಠಾಣೆಯ ಮೆಟ್ಟಿಲೇರಿದ್ದಾರೆ.
ತಮ್ಮ ಹೆಸರಿನಲ್ಲಿ 20 ನಕಲಿ ಇನ್ಸ್ಟಾಗ್ರಾಂ ಖಾತೆಗಳಿರುವುದು ಗೊತ್ತಾದ ಬೆನ್ನಲ್ಲೇ ಶಾಕ್ ಆಗಿರುವ ಐಶ್ವರ್ಯಾ ನಕಲಿ ಖಾತೆ ತೆರೆದವರ ವಿರುದ್ಧ ಮುಂಬೈನ ಕೊಲಬಾ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲಿಸಿದ್ದಾರೆ.
ಇದನ್ನೂ ಓದಿ: ದೇವೇಗೌಡರೇ, ನೀವು ಕ್ಷಮೆ ಕೇಳುವುದು ನಮಗೆ ಮುಜುಗರ… ಎಂದ ಜೆಡಿಎಸ್ ಕಾರ್ಯಕರ್ತ
ಫೋಟೋ ಶೇರಿಂಗ್ ವೇದಿಕೆ ಇನ್ಸ್ಟಾಗ್ರಾಂನಲ್ಲಿ ಐಶ್ವರ್ಯಾ ಒಪ್ಪಿಗೆ ಇಲ್ಲದೆಯೇ ಅನೇಕ ಫೋಟೋಗಳು ಶೇರ್ ಆಗಿವೆ. ಅನೇಕ ಬ್ಯೂಟಿ ಸ್ಪರ್ಧೆಗಳಲ್ಲಿ ಭಾಗವಹಿಸಿರುವ ಐಶ್ವರ್ಯಾ, ಇದುವರೆಗೂ ನನ್ನ ಹೆಸರಿನಲ್ಲಿ ಯಾವುದೇ ಇನ್ಸ್ಟಾಗ್ರಾಂ ಖಾತೆಯನ್ನು ಹೊಂದಿಲ್ಲ ಎಂದು ಪೊಲೀಸರಿಗೆ ತಿಳಿಸಿದ್ದಾರೆ.
ಅಂದಹಾಗೆ ಐಶ್ವರ್ಯಾ 2017ರಿಂದ ಕೊಲಬಾದಲ್ಲಿರುವ ಕಾಲನಿಯಲ್ಲಿರುವ ಆರ್ಮಿ ಆಫೀಸರ್ ಕಾಲನಿಯಲ್ಲಿ ಕುಟುಂಬದೊಂದಿಗೆ ನೆಲೆಸಿದ್ದಾರೆ. ಅವರ ತಂದೆ ಕರ್ನಲ್ ಅಜಯ್ಕುಮಾರ್ ಶಿಯೋರನ್ ಕರೀಮ್ನಗರದಲ್ಲಿ ತೆಲಂಗಾಣ ಬೆಟಾಲಿಯನ್ನ ಕಮಾಂಡಿಂಗ್ ಅಧಿಕಾರಿಯಾಗಿದ್ದಾರೆ.
ನಕಲಿ ಇನ್ಸ್ಟಾಗ್ರಾಂ ಖಾತೆ ತೆರೆದಿರುವುದು ಗಂಭೀರ ವಿಚಾರವಲ್ಲ. ಆದರೆ, ಭವಿಷ್ಯದಲ್ಲಿ ಇದೇ ದುರ್ಬಳಕೆ ಆಗುವ ಸಾಧ್ಯತೆ ಇದೆ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: ಯುವತಿಯ ಬಣ್ಣದ ಮಾತು ನಂಬಿದ ನಿವೃತ್ತ ವೈದ್ಯರಿಬ್ಬರಿಗೆ ಕಾದಿತ್ತು ಬಿಗ್ ಶಾಕ್!
ಸಂದರ್ಶನವೊಂದರಲ್ಲಿ ನನ್ನ ಇನ್ಸ್ಟಾಗ್ರಾಂ ಖಾತೆ ಬಗ್ಗೆ ಹೇಳಿದರು. ಯಾವುದೇ ಖಾತೆಯನ್ನು ಹೊಂದಿರದ ನನಗೆ ಅವರು ಹೇಳಿದ್ದನ್ನು ಕೇಳಿ ಶಾಕ್ ಆಯಿತು. ಬಳಿಕ ಪರಿಶೀಲಿಸುವಂತೆ ನನ್ನ ಸಹೋದರಿಗೆ ಹೇಳಿದೆ. ಆಗ ನನ್ನ ಹೆಸರಿನಲ್ಲಿ 20 ನಕಲಿ ಖಾತೆ ಇರುವುದು ಬೆಳಕಿಗೆ ಬಂತು. ಅನೇಕ ಖಾತೆಗಳು ಅಧಿಕೃತ ಎಂದು ಹೇಳಿಕೊಂಡಿವೆ. ಅದರಲ್ಲಿ ಒಂದು ಖಾತೆಗೆ 27 ಸಾವಿರ ಫಾಲೋವರ್ಸ್ಗಳಿದ್ದಾರೆ. ಹೀಗಾಗಿ ಮುಂದೆ ದುರ್ಬಳಕೆ ಮಾಡಿಕೊಳ್ಳಬಹುದೆಂಬ ಕಾರಣಕ್ಕೆ ದೂರು ನೀಡಿದೆವು ಎಂದು ಹೇಳಿದ್ದಾರೆ.
ಐಶ್ವಯಾ ಅವರು 2015ರ ದೆಹಲಿ ಫ್ರಶ್ಫೇಸ್ ವಿನ್ನರ್, 2016ರ ದೆಹಲಿ ಕ್ಯಾಂಪಸ್ ಪ್ರಿನ್ಸೆಸ್ ಹಾಗೂ 2016ರ ಫೆಮಿನಾ ಮಿಸ್ ಇಂಡಿಯಾ ಫೈನಲಿಸ್ಟ್ ಆಗಿ ಹೆಸರು ಗಳಿಸಿದ್ದಾರೆ. 2019ನೇ ಸಾಲಿನ ಯುಪಿಎಸ್ಸಿ ಪರೀಕ್ಷೆಯಲ್ಲಿ 93ನೇ ರ್ಯಾಂಕ್ ಪಡೆದಿದ್ದು, ಮಾಡೆಲಿಂಗ್ ಮಾತ್ರವಲ್ಲದೇ ಯುಪಿಎಸ್ಸಿಯಲ್ಲೂ ಗಮನಾರ್ಹ ಸಾಧನೆ ಮಾಡಿದ್ದಾರೆ. ಹೀಗಾಗಿ ಐಶ್ವರ್ಯಾ ಅವರು ಸೌಂದರ್ಯ ಹಾಗೂ ಬುದ್ಧಿವಂತಿಕೆಗೆ ನೈಜ ಉದಾಹರಣೆ ಎಂದು ಕೊಂಡಾಡಿದ್ದಾರೆ. (ಏಜೆನ್ಸೀಸ್)
ನಗ್ನ ಸ್ಥಿತಿಯಲ್ಲಿ ಪತ್ತೆಯಾಯ್ತಾ ದಿಶಾ ಶವ? ಮುಂಬೈ ಪೊಲೀಸರು ಸಾಕ್ಷಿ ಇದೆ ಎಂದಿದ್ದೇಕೆ?