ಧಾರವಾಡ: ಯೋಗೀಶಗೌಡ ಗೌಡರ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿ ಸಿಬಿಐ ವಶದಲ್ಲಿರುವ 6 ಸುಪಾರಿ ಹಂತಕರ ವಿಚಾರಣೆ ಶುಕ್ರವಾರವೂ ನಡೆಯಿತು. ಅಧಿಕಾರಿಗಳ ತಂಡ ಆರೋಪಿಗಳನ್ನು ದಾಂಡೇಲಿಯ ರೆಸಾರ್ಟ್ವೊಂದಕ್ಕೆ ಕರೆದೊಯ್ದು, ಅಲ್ಲಿ ತಂಗಿದ್ದ ಸ್ಥಳ ಮಹಜರು ನಡೆಸಿ ವಿಚಾರಣೆಗೊಳಪಡಿಸಿದ್ದಾರೆ ಎಂದು ತಿಳಿದುಬಂದಿದೆ.
2016ರ ಜೂನ್ 15ರಂದು ಯೋಗೀಶಗೌಡ ಕೊಲೆಗೂ ಮುಂಚೆ ಬೆಂಗಳೂರು ಮೂಲದ ಆರೋಪಿಗಳಾದ ದಿನೇಶ, ಸುನೀಲ, ನೂತನ್, ಅಶ್ವತ್ಥ್, ಶಾನವಾಜ್ ಹಾಗೂ ನಜೀರಅಹಮದ್ ದಾಂಡೇಲಿಯ ರೆಸಾರ್ಟ್ನಲ್ಲಿ 3 ದಿನ ತಂಗಿದ್ದರು ಎನ್ನಲಾಗಿದೆ. ರೆಸಾರ್ಟ್ ಧಾರವಾಡ ಮೂಲದ ಇಂಜಿನಿಯರ್ ರೂಪೇಂದ್ರ ಸೇರಿ ಮೂವರ ಒಡೆತನದಲ್ಲಿದೆ.
ವಿಚಾರಣೆ ವೇಳೆ ಆರೋಪಿಗಳು ತಾವು
ರೆಸಾರ್ಟ್ನಲ್ಲಿ ತಂಗಿದ್ದ ವಿಷಯ ಬಾಯಿಬಿಟ್ಟಿದ್ದರು. ಹಾಗಾಗಿ ಸಿಬಿಐ ಅಧಿಕಾರಿಗಳು ಅಲ್ಲಿಗೆ ಕರೆದೊಯ್ದಿದ್ದಾರೆ.
ಶುಕ್ರವಾರ ಸಿಬಿಐ ತಂಡ ನಗರದಲ್ಲೆಲ್ಲೂ ಕಾಣಿಸಿಕೊಳ್ಳಲಿಲ್ಲ. 3-4 ದಿನಗಳಿಂದ ಉಪನಗರ ಠಾಣೆ ಹಾಗೂ ಜರ್ಮನ್ ಆಸ್ಪತ್ರೆ ವೃತ್ತದ ಪೊಲೀಸ್ ಅತಿಥಿಗೃಹಕ್ಕೆ ಆರೋಪಿಗಳನ್ನು ಕರೆಸಿಕೊಂಡು ವಿಚಾರಣೆ ನಡೆಸುತ್ತಿದ್ದರು. ಒಂದು ತಂಡ ಅಜ್ಞಾತ ಸ್ಥಳದಲ್ಲಿ ಕೆಲ ಆರೋಪಿಗಳನ್ನು ವಿಚಾರಣೆಗೊಳಪಡಿಸಿದೆ ಎಂದು ತಿಳಿದುಬಂದಿದೆ.
ನ್ಯಾಯಾಲಯಕ್ಕೆ ಇಂದು: ಬೆಂಗಳೂರಿನಲ್ಲಿ ಬಂಧಿತ 6 ಆರೋಪಿಗಳ ಸಿಬಿಐ ಕಸ್ಟಡಿ ಮಾ. 7ಕ್ಕೆ ಅಂತ್ಯಗೊಳ್ಳಲಿದೆ. ಹೀಗಾಗಿ ಆರೋಪಿಗಳನ್ನು ಅಧಿಕಾರಿಗಳು ಶನಿವಾರ ಪ್ರಧಾನ ದಿವಾಣಿ ನ್ಯಾಯಾಲಯಕ್ಕೆ ಹಾಜರುಪಡಿಸಲಿದ್ದಾರೆ.
ಪೊಲೀಸರಿಗೂ ಡ್ರಿಲ್?: ಆರಂಭದಲ್ಲಿ ಕೊಲೆ ಪ್ರಕರಣದ ತನಿಖೆ ನಡೆಸಿದ್ದ ಉಪನಗರ ಠಾಣೆ ಪೊಲೀಸರು ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಸಿದ್ದಾರೆ. ಆದರೆ ಕೊಲೆಗಾಗಿ ಬಳಸಲಾಗಿದ್ದ ಕಪ್ಪು ಬಣ್ಣದ ಶವರ್ಲೆ ಕಾರನ್ನು ಸಿಬಿಐ ಅಧಿಕಾರಿಗಳು ಪತ್ತೆ ಹಚ್ಚಿದ್ದಾರೆ. ಪೊಲೀಸ್ ತನಿಖೆಯಲ್ಲಿ ಹಲವು ಅಂಶಗಳು ಬಿಟ್ಟು ಹೋಗಿರುವುದು ಬಯಲಾಗುತ್ತಿವೆ. ಈ ಹಿನ್ನೆಲೆಯಲ್ಲಿ ಅಂದು ಉಪನಗರ ಠಾಣೆಯಲ್ಲಿ ಸೇವೆಯಲ್ಲಿದ್ದ ಕೆಲ ಸಿಬ್ಬಂದಿ ಹಾಗೂ ಹಿರಿಯ ಅಧಿಕಾರಿಗಳನ್ನೂ ಸಿಬಿಐ ತಂಡ ಈಗಾಗಲೇ ವಿಚಾರಣೆಗೊಳಪಡಿಸಿದೆ ಎಂದು ತಿಳಿದುಬಂದಿದೆ.