ಚಿತ್ರದುರ್ಗ: ನಗರದ ಹಳೆ ಮಾಧ್ಯಮಿಕ ಶಾಲಾ ಮೈದಾನದಲ್ಲಿ ನ. 15ರಿಂದ 18ರವರೆಗೂ ಸಾಹಸಸಿಂಹ ಡಾ.ವಿಷ್ಣುವರ್ಧನ್ ಕಪ್-2024 ಟೆನಿಸ್‌ಬಾಲ್ ಕ್ರಿಕೆಟ್ ಟೂರ್ನಿ ಹಮ್ಮಿಕೊಳ್ಳಲಾಗಿದೆ ಎಂದು ಸಂಘಟಕ ಅರುಣ್ ತಿಳಿಸಿದರು.
ಬುಧವಾರ ಟ್ರೋಫಿ ಲಾಂಚ್ ವೇಳೆ ಮಾತನಾಡಿ, ಡಾ.ವಿಷ್ಣುವರ್ಧನ್ ಅಭಿಮಾನಿಗಳ ಸಂಘ, ಸಮಸ್ತ ವಿಷ್ಣುವರ್ಧನ್ ಅಭಿಮಾನಿಗಳ ಸಹಕಾರ, ದುರ್ಗನ್ಸ್ ಕ್ರಿಕೆಟ್ ಆಟಗಾರರು, ವಿಷ್ಣು ಕ್ರಿಕೆಟರ್ಸ್‌ನಿಂದ ಟೂರ್ನಿ ಆಯೋಜಿಸಲಾಗಿದೆ ಎಂದರು.
ಅಭಿಮಾನಿ ಅಜಯ್ ಮಾತನಾಡಿ, ಈಗಾಗಲೇ 18 ತಂಡಗಳು ನೋಂದಾಯಿಸಿವೆ. ಪ್ರಥಮ ಬಹುಮಾನ 1 ಲಕ್ಷ ರೂ., ದ್ವಿತೀಯ ಬಹುಮಾನ 50ಸಾವಿರ ರೂ., ಸೆಮಿಫೈನಲ್ ಪ್ರವೇಶಿಸುವ ತಂಡಗಳಿಗೆ 10ಸಾವಿರ ರೂ., ತಲಾ ಆಕರ್ಷಕ ಟ್ರೋಫಿ ನೀಡಲಾಗುವುದು ಎಂದು ತಿಳಿಸಿದರು.
ಪಂದ್ಯ ಪುರುಷೋತ್ತಮ, ಸರಣಿ ಸರ್ವೋತ್ತಮ, ಉತ್ತಮ ಬ್ಯಾಟ್ಸ್‌ಮನ್, ಉತ್ತಮ ಬೌಲರ್ ಪ್ರಶಸ್ತಿಗಳನ್ನೂ ವಿತರಿಸಲಾಗುವುದು ಎಂದರು.
ಅಭಿಮಾನಿಗಳಾದ ಪ್ರಶಾಂತ್, ರೇವಣ್ಣ, ಲೋಕೇಶ್, ತಿಪ್ಪೇಶ್ ಇತರರಿದ್ದರು.