ವಿಜಯನಗರ ಎಫ್‌ಸಿ ತಂಡಕ್ಕೆ ಪ್ರಶಸ್ತಿ

ಮಡಿಕೇರಿ: ಕೆಕೆಎಫ್‌ಸಿ ಫುಟ್ಬಾಲ್ ಕ್ಲಬ್ ವತಿಯಿಂದ ಚೆಟ್ಟಳ್ಳಿ ಪ್ರೌಢಶಾಲಾ ಮೈದಾನದಲ್ಲಿ ಇತ್ತೀಚೆಗೆ ನಡೆದ ರಾಜ್ಯಮಟ್ಟದ ಕಾಲ್ಚೆಂಡು ಪಂದ್ಯಾಟದಲ್ಲಿ ವಿಜಯನಗರ ಎಫ್‌ಸಿ ತಂಡ, ಬಿಎಸ್‌ಎ ಕುಂದಾ ತಂಡವನ್ನು 1-0 ಗೋಲುಗಳ ಅಂತರದಿಂದ ಸೋಲಿಸಿ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿತು.

ಮೊದಲನೇ ಸೆಮಿಫೈನಲ್ ಪಂದ್ಯ ವಿಜಯನಗರ ಎಫ್‌ಸಿ ಮೈಸೂರು ಹಾಗೂ ಅಂಬೇಡ್ಕರ್ ಯೂತ್ ಕ್ಲಬ್ ಅಮ್ಮತ್ತಿ ತಂಡಗಳ ನಡುವೆ ನಡೆಯಿತು. ಪಂದ್ಯಾಟದಲ್ಲಿ ವಿಜಯನಗರ ಎಫ್‌ಸಿ ತಂಡವು 2-1 ಗೋಲುಗಳ ಅಂತರದಿಂದ ಗೆಲುವು ಸಾಧಿಸಿತು. ಎರಡನೇ ಸೆಮಿಫೈನಲ್‌ನಲ್ಲಿ ಅತಿಥಿ ತಂಡವಾದ ಬಿಎಸ್‌ಎ ಕುಂದಾ ಹಾಗೂ ಸಿಸಿ ಎಫ್‌ಸಿ ಕಾಫಿಬೋರ್ಡ್ ನಡುವೆ ನಡೆದ ಸೆಣಸಾಟದಲ್ಲಿ ಬಿ.ಎಸ್.ಎ ಕುಂದಾ ತಂಡವು 4-1 ಗೋಲುಗಳ ಅಂತರದಿಂದ ಗೆಲುವು ಸಾಧಿಸಿದರು.

ತೃತೀಯ ಸ್ಥಾನಕ್ಕಾಗಿ ಸಿಸಿಎಫ್‌ಸಿ ಹಾಗೂ ಅಂಬೇಡ್ಕರ್ ಅಮ್ಮತ್ತಿ ತಂಡಗಳ ನಡುವೆ ನಡೆದ ಪಂದ್ಯಾಟದಲ್ಲಿ ಸಿಸಿಎಫ್‌ಸಿ ಕಾಫಿಬೋರ್ಡ್ ತಂಡವು 2-0 ಗೋಲುಗಳ ಅಂತರದಿಂದ ಅಂಬೇಡ್ಕರ್ ತಂಡವನ್ನು ಮಣಿಸಿ ತೃತೀಯ ಸ್ಥಾನವನ್ನು ಪಡೆಯಿತು. ಜಿಲ್ಲೆಯ ಎರಡು ಮಹಿಳಾ ತಂಡದ ಪ್ರದರ್ಶನ ಪಂದ್ಯದಲ್ಲಿ ಜಿಲ್ಲಾ ಸೋಕರ್ ವುಮೆನ್ಸ್ ಫುಟ್ಬಾಲ್ ಕ್ಲಬ್, ಗೋಣಿಕೊಪ್ಪಲಿನ ತಂಡವನ್ನು ಮಣಿಸಿ ಜಯಶೀಲರಾದರು.

ಪಂದ್ಯಾಟದ ಅತ್ಯುತ್ತಮ ಆಟಗಾರನಾಗಿ ಅಂಬೇಡ್ಕರ್ ತಂಡದ ಪೆರೇರಾ, ಟಾಪ್ ಸ್ಕೋರರ್‌ರಾಗಿ ಕುಂದಾ ತಂಡದ ಚಿಡಿ, ಬೆಸ್ಟ್ ಗೋಲ್ ಕೀಪರ್ ಕುಂದಾ ತಂಡದ ದಿಲ್ಶಾದ್, ಫಿಟ್ನೆಸ್ ಆಟಗರಾನಾಗಿ ಸಿಸಿಎಫ್‌ಸಿ ತಂಡದ ಕಾರ್ತಿಕ್, ಎಮರ್ಜಿಂಗ್ ಆಟಗಾರನಾಗಿ ಕುಂದಾ ತಂಡದ ವಿಷ್ಣು, ಅತ್ಯುತ್ತಮ ತಂಡದ ಪ್ರಶಸ್ತಿಯನ್ನು ಶೈನ್ ಸ್ಟಾರ್ ಕೇರಳ, ಬೆಸ್ಟ್ ಡಿಫೆಂಡರ್ ಕುಂದಾ ತಂಡದ ಅನ್ಶಾಫ್, ಬೆಸ್ಟ್ ಸ್ಟ್ರೈಕರ್‌ರಾಗಿ ಸಿಸಿಎಫ್‌ಸಿ ತಂಡದ ಪವನ್, ಮಿಡ್ ಪೀಲ್ಡರ್‌ರಾಗಿ ವಿಜಯನಗರ ತಂಡದ ಪ್ರವೀಣ್ ಹಾಗೂ ಫೈನಲ್ ಪಂದ್ಯದ ಅತ್ಯುತ್ತಮ ಆಟಗಾರ ಪ್ರಶಸ್ತಿಯನ್ನು ಮೈಸೂರು ತಂಡದ ಮೋಹಿತ್ ಪಡೆದುಕೊಂಡರು. ಪಂದ್ಯಾವಳಿಯ ತೀರ್ಪುಗಾರರಾಗಿ ಇಬ್ರಾಹಿಂ, ಈಶ್ವರ್, ಮಹೇಂದ್ರ ಹಾಗೂ ರಿಚರ್ಡ್ ಕಾರ್ಯನಿರ್ವಹಿಸಿದರು.

ಸಮಾರೋಪ ಸಮಾರಂಭ: ಸಮಾರೋಪ ಸಮಾರಂಭದ ಅಧ್ಯಕ್ಷತೆಯನ್ನು ಕ್ಲಬ್‌ನ ಅಧ್ಯಕ್ಷ ಮೊಹಮ್ಮದ್ ರಫಿ ವಹಿಸಿದ್ದರು. ಜಿಲ್ಲಾ ಪಂಚಾಯತಿ ಸದಸ್ಯೆ ಸುನಿತಾ ಮಂಜುನಾಥ್, ಗ್ರಾಮ ಪಂಚಾಯತಿ ಸದಸ್ಯರಾದ ಕಂಠಿ ಕಾರ್ಯಪ್ಪ, ಗೌತಮ್ ರಾಮ್ ಪ್ರಸಾದ್, ಕ್ಲಬ್‌ನ ಗೌರವಾಧ್ಯಕ್ಷ ರೈಮನ್ ಸರವೋ, ಉಪಾಧ್ಯಕ್ಷ ಶಶಿಕುಮಾರ್, ಮಂಜುನಾಥ್, ಜಗದೀಶ್, ಪತ್ರಕರ್ತ ಇಸ್ಮಾಯಿಲ್ ಕಂಡಕರೆ, ಮೊಹಮ್ಮದ್ ಆಲಿ, ಕಂಡಕರೆ ಬ್ರೈಟ್ ಕ್ಲಬ್‌ನ ಅಧ್ಯಕ್ಷ ಮನ್ಸೂರ್ ಆಲಿ, ಸುರೇಶ್ ಬಾಬು, ಚಂದ್ರ, ಜುಬೈರ್ ಮತ್ತಿತ್ತರರು ಇದ್ದರು.

ಇದೇ ಸಂದರ್ಭ ಚೆಟ್ಟಳ್ಳಿ ಪ್ರೌಢಶಾಲೆಯಲ್ಲಿ ಹತ್ತನೇ ತರಗತಿ ಹಾಗೂ ಚೆಟ್ಟಳ್ಳಿ ಪ್ರಾಥಮಿಕ ಶಾಲೆಯಲ್ಲಿ ಪ್ರಥಮ ಹಾಗೂ ದ್ವಿತೀಯ ಸ್ಥಾನ ಪಡೆದ ವಿದ್ಯಾರ್ಥಿಗಳನ್ನು ಸನ್ಮಾನಿಸಲಾಯಿತು.