ರಸ್ತೆ ಕಾಮಗಾರಿ ಬಂದ್ ಮಾಡಿಸಿದ ಜನತೆ

ಬಂಕಾಪುರ: ನಗರೋತ್ಥಾನ ಯೋಜನೆಯಡಿ ಪಟ್ಟಣದಲ್ಲಿ ಕೈಗೊಳ್ಳುತ್ತಿರುವ ರಸ್ತೆ ಡಾಂಬರೀಕರಣ ಕಾಮಗಾರಿ ಕಳಪೆಯಾಗಿದೆ ಎಂದು ಆರೋಪಿಸಿ ಸಾರ್ವಜನಿಕರು ಕಾಮಗಾರಿ ಬಂದ್ ಮಾಡಿಸಿದ ಘಟನೆ ಶನಿವಾರ ನಡೆದಿದೆ.

ಪಟ್ಟಣದಲ್ಲಿ ನಗರೋತ್ಥಾನ ಯೋಜನೆಯಡಿ 6ನೇ ವಾರ್ಡ್​ನ ಭೋಸಲೆ ಅವರ ಮನೆಯಿಂದ ಚಿಂಚಲಿ ಅವರ ಮನೆಯವರೆಗಿನ 850 ಮೀಟರ್ ಉದ್ದದ ಡಾಂಬರೀಕರಣ ಕಾಮಗಾರಿ ತರಾತುರಿಯಲ್ಲಿ ಮುಕ್ತಾಯಗೊಳಿಸಲು ಗುತ್ತಿಗೆದಾರರು ಪ್ರಯತ್ನಿಸುತ್ತಿದ್ದಾರೆ. ಇದರಿಂದ ಕಾಮಗಾರಿ ಕಳಪೆಯಾಗುತ್ತಿದೆ ಎಂದು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದರು.

ಡಾಂಬರೀಕರಣಕ್ಕೂ ಮುನ್ನ ರಸ್ತೆಯ ಎರಡು ಬದಿಗಳಲ್ಲಿ ಕೈಗೊಂಡಿರುವ ಮೆಟ್ಲಿಂಗ್ ಕೆಲಸ ಸಂಪೂರ್ಣ ಕಳಪೆಯಾಗಿದ್ದು, ಅದರ ಮೇಲೆಯೇ ಡಾಂಬರೀಕರಣ ಮಾಡಲಾಗುತ್ತಿದೆ. ಇದಲ್ಲದೆ ಯೋಜನೆಯಂತೆ ರಸ್ತೆಯ ಎರಡು ಕಡೆ ಸಿಡಿ ನಿರ್ಮಾಣ ಮಾಡಬೇಕಾಗಿತ್ತು. ಅದನ್ನು ಗಣನೆಗೆ ತೆಗೆದುಕೊಳ್ಳದೆ ತರಾತುರಿಯಲ್ಲಿ ಕಾಮಗಾರಿ ಕೈಗೊಳ್ಳಲಾಗುತ್ತಿದೆ ಎಂದು ಆರೋಪಿಸಿದರು.

ಪಟ್ಟಣದಲ್ಲಿ ನಡೆಯುತ್ತಿರುವ ನಗರೋತ್ಥಾನ ಕಾಮಗಾರಿಗಳ ಬಗೆಗೆ ನಿಗಾ ವಹಿಸಬೇಕಾಗಿದ್ದ ಪುರಸಭೆ ಅಧಿಕಾರಿಗಳು ಇತ್ತ ಗಮನ ಹರಿಸದೇ ಇರುವುದು ಸಾರ್ವಜನಿಕರಲ್ಲಿ ಸಂಶಯ ವ್ಯಕ್ತವಾಗಿದೆ. ಆದ್ದರಿಂದ ಜಿಲ್ಲಾಧಿಕಾರಿ ಪಟ್ಟಣಕ್ಕೆ ಭೇಟಿ ನೀಡಿ, ಪಟ್ಟಣದಲ್ಲಿ ನಡೆಯುತ್ತಿರುವ ನಗರೋತ್ಥಾನ ಯೋಜನೆಯ ಕಾಮಗಾರಿಗಳ ಗುಣಮಟ್ಟ ಪರಿಶೀಲಿಸಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದರು.

ಸಿದ್ದಯ್ಯಸ್ವಾಮಿ ಗೌರಿಮಠ, ನಿಂಗನಗೌಡ್ರ ಪಾಟೀಲ, ಬಸವರಾಜ ಅರಳಿಕಟ್ಟಿ, ಗದಿಗೆಪ್ಪ ಕಳಸೂರ, ಸಹದೇವಪ್ಪ ಚಿಲ್ಲೂರ, ಚನ್ನಬಸಪ್ಪ ಚಿಲ್ಲೂರ, ವಿಜಯ ಹರವಿ ಇತರರು ಇದ್ದರು.

ಬಂಕಾಪುರ ನಗರೋತ್ಥಾನ ಯೋಜನೆಯಡಿ ಪಟ್ಟಣದಲ್ಲಿ ಕೈಗೊಳ್ಳುತ್ತಿರುವ ರಸ್ತೆ ಡಾಂಬರೀಕರಣ ಕಾಮಗಾರಿ ಕಳಪೆಯಾಗಿದೆ ಎಂದು ತೋರಿಸುತ್ತಿರುವ ಸಾರ್ವಜನಿಕರು. ಸಿದ್ದಯ್ಯಸ್ವಾಮಿ ಗೌರಿಮಠ, ನಿಂಗನಗೌಡ್ರ ಪಾಟೀಲ, ಬಸವರಾಜ ಅರಳಿಕಟ್ಟಿ, ಗದಿಗೆಪ್ಪ ಕಳಸೂರ ಇದ್ದರು.