Friday, 16th November 2018  

Vijayavani

ಜನಾರ್ದನರೆಡ್ಡಿ ಕೇಸ್ ಬೆನ್ನಲ್ಲೇ ಡಿಕೆಶಿಗೆ ಬಂಧನ ಭೀತಿ - ಇಡಿಯಿಂದ 3ನೇ ಬಾರಿ ಇಡಿ ನೋಟಿಸ್ ಜಾರಿ        ಆ್ಯಂಬಿಂಡೆಟ್ ಪ್ರಕರಣದಲ್ಲಿ ಇಡಿ ಹೆಸರಿಗೆ ಆಕ್ಷೇಪ - ಸಿಸಿಬಿ ವಿರುದ್ಧ ಇಡಿ ಜಂಟಿ ನಿರ್ದೇಶಕ ಗರಂ        ಸಚಿವ ಸಂಪುಟ ವಿಸ್ತರಣೆಗೆ ಧನುರ್ಮಾಸದ ಎಫೆಕ್ಟ್ - ಸದ್ಯಕ್ಕಿಲ್ಲ ಆಕಾಂಕ್ಷಿಗಳಿಗೆ ಸಚಿವ ಭಾಗ್ಯ - ಕಾಂಗ್ರೆಸ್ಸಿಗರಲ್ಲಿ ಮತ್ತೆ ಅಸಮಾಧಾನ        ರಾಜ್ಯಾದ್ಯಂತ ಭುಗಿಲೆದ್ದ ರೈತರ ಹೋರಾಟದ ಕಿಚ್ಚು - ರೈತರನ್ನು ಭೇಟಿಯಾಗುವುದಾಗಿ ಹೇಳಿದ ಕುಮಾರಸ್ವಾಮಿ        ಗಾಂಧಿ ಕುಟುಂಬ ಬಿಟ್ಟು ಬೇರೆಯವರು ಎಐಸಿಸಿ 5 ಅಧ್ಯಕ್ಷರಾಗಲಿ - ಕಾಂಗ್ರೆಸ್​ಗೆ ಪ್ರಧಾನಿ ಮೋದಿಯಿಂದ ನೇರ ಸವಾಲು        ತಮಿಳುನಾಡಿನಾದ್ಯಂತ ಗಜ ಚಂಡಮಾರುತದ ಅರ್ಭಟ - 20ಕ್ಕೂ ಹೆಚ್ಚು ಮಂದಿ ದುರ್ಮರಣ - ಅಪಾರ ಆಸ್ತಿ ಪಾಸ್ತಿ, ಬೆಳೆ ನಾಶ       
Breaking News

ತಾಯಿ ಎದುರಲ್ಲೇ ಹಳ್ಳದಲ್ಲಿ ಕೊಚ್ಚಿ ಹೋದ ಬಾಲಕಿ

Monday, 09.07.2018, 6:17 PM       No Comments

ತೀರ್ಥಹಳ್ಳಿ: ಕಾಲು ಸಂಕ ದಾಟುವ ವೇಳೆ ವಿದ್ಯಾರ್ಥಿನಿಯೊಬ್ಬಳು ತಾಯಿಯ ಎದುರಲ್ಲೇ ಮಳೆಯಿಂದ ತುಂಬಿ ಹರಿಯುತ್ತಿದ್ದ ಹಳ್ಳಕ್ಕೆ ಜಾರಿ ಬಿದ್ದು ನೀರಿನಲ್ಲಿ ಕೊಚ್ಚಿ ಹೋಗಿದ್ದಾಳೆ.

ಆಗುಂಬೆ ಸಮೀಪದ ಹೊನ್ನೇತಾಳು ಗ್ರಾಪಂ ವ್ಯಾಪ್ತಿಯ ಕೆಂದಾಳುಬೈಲು ಸಮೀಪದ ದೊಡ್ಲಿಮನೆಯಲ್ಲಿ ಸೋಮವಾರ ಬೆಳಗ್ಗೆ ಬಾಲಕಿ ಆಶಿಕಾ(15) ನೀರು ಪಾಲಾಗಿದ್ದಾಳೆ. ಈಕೆ ಗುಡ್ಡೇಕೇರಿ ಸರ್ಕಾರಿ ಪ್ರೌಢಶಾಲೆಯ 9ನೇ ತರಗತಿ ವಿದ್ಯಾರ್ಥಿನಿ.

ಭಾರಿ ಮಳೆಯ ಕಾರಣ ಸೋಮವಾರ ಶಾಲೆಗಳಿಗೆ ರಜೆ ಘೊಷಿಸಲಾಗಿತ್ತು. ಈ ವಿಷಯ ಆಶಿಕಾಗೆ ಗೊತ್ತಿರಲಿಲ್ಲ. ಮಗಳನ್ನು ಶಾಲೆಗೆ ಕಳುಹಿಸಲು ತಾಯಿ ತೆರಳಿದ್ದರು. ಶಾಲೆ ರಜೆ ಇದ್ದುದರಿಂದ ಇಬ್ಬರೂ ವಾಪಸ್ ಬರುತ್ತಿದ್ದರು. ಮನೆಗೆ ಅಂದಾಜು 200 ಮೀಟರ್ ಸಮೀಪದಲ್ಲಿರುವ ಹಳ್ಳಕ್ಕೆ ಕಾಲು ಸಂಕ ನಿರ್ವಿುಸಲಾಗಿದೆ. ಇದರ ಮೇಲೆ ಅಡಕೆ ದಬ್ಬೆಗಳನ್ನೂ ಹಾಕಲಾಗಿದೆ. ತಾಯಿಗಿಂತ ಮುಂಚೆ ಈ ಕಾಲುಸಂಕ ದಾಟುವಾಗ ಬಾಲಕಿ ಕಾಲು ಜಾರಿ 10 ಅಡಿ ಆಳದ ಹಳ್ಳಕ್ಕೆ ಬಿದ್ದಿದ್ದಾಳೆ. ತಾಯಿ ಕೂಗಿಕೊಂಡರೂ ಯಾರೂ ಸಹಾಯಕ್ಕೆ ಬರುವ ಸ್ಥಿತಿ ಇರಲಿಲ್ಲ. ಹಳ್ಳದಲ್ಲಿ ನೀರಿನ ಸೆಳೆತ ಜೋರಾಗಿದ್ದರಿಂದ ಕೊಚ್ಚಿ ಹೋಗಿದ್ದಾಳೆ. ಸೋಮವಾರ ಸಂಜೆ ವೇಳೆ ಮೃತ ದೇಹ ಪತ್ತೆಯಾಗಿದೆ.

ಶವದ ಹಡುಕಾಟದಲ್ಲಿ ಗ್ರಾಮಸ್ಥರೊಂದಿಗೆ ಆಗುಂಬೆ ಪೊಲೀಸರು ಶ್ರಮಿಸಿದರು. ಹಳ್ಳದಲ್ಲಿ ಭಾರಿ ನೀರಿನ ಸೆಳೆತ ಇದ್ದ ಕಾರಣ ಶವ ಸಿಗುವುದು ವಿಳಂಬವಾಯಿತು. ಸ್ಥಳಕ್ಕೆ ಜಿಪಂ ಸದಸ್ಯೆ ಭಾರತಿ ಪ್ರಭಾಕರ್, ತಹಶೀಲ್ದಾರ್ ಆನಂದಪ್ಪ ನಾಯ್್ಕ ಬಿಇಒ ಪ್ರಸನ್ನಕುಮಾರ್ ಹಾಗೂ ಗುಡ್ಡೆಕೇರಿ ಪ್ರೌಢಶಾಲೆಯ ಮುಖ್ಯೋಪಾಧ್ಯಾಯ ಮಂಜುಬಾಬು ಮುಂತಾದವರು ಭೇಟಿ ನೀಡಿ ಬಾಲಕಿಯ ತಾಯಿಗೆ ಸಾಂತ್ವನ ಹೇಳಿದರು.

ಈಕೆಯದು ಕೇವಲ ಅರ್ಧ ಎಕರೆ ತರಿ ಭೂಮಿಯನ್ನು ಹೊಂದಿರುವ ಬಡ ಕುಟುಂಬ. ಈಕೆಯ ತಂದೆ ಯೋಗೇಂದ್ರ ಕಳೆದ ವರ್ಷ ಆತ್ಮಹತ್ಯೆ ಮಾಡಿಕೊಂಡಿದ್ದು, ತಾಯಿ ಅನಿತಾ ಕೃಷಿ ಕೂಲಿ ಕಾರ್ವಿುಕರು. ಮೃತಳಿಗೆ 6ನೇ ತರಗತಿಯಲ್ಲಿ ಓದುವ ಒಬ್ಬ ಸಹೋದರನಿದ್ದಾನೆ. ಪ್ರತಿದಿನ 3 ಕಿಮೀ (ಎರಡೂ ಕಡೆ 6 ಕಿಮೀ) ಕಾಡು ಹಾದಿಯನ್ನು ಕ್ರಮಿಸಿ ಆಶಿಕಾ ಗುಡ್ಡೇಕೇರಿ ಶಾಲೆಗೆ ಬರುತ್ತಿದ್ದಳು. ಆಗುಂಬೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಕೊನೆ ಕ್ಷಣದಲ್ಲಿ ರಜೆಯ ಗೊಂದಲ: ಭಾರಿ ಮಳೆಯಿಂದಾಗಿ ಕೊನೆ ಕ್ಷಣದಲ್ಲಿ ಶಾಲೆಗಳಿಗೆ ರಜೆ ಘೊಷಿಸುತ್ತಿರುವ ಅಧಿಕಾರಿಗಳ ಕ್ರಮಕ್ಕೆ ಸಾರ್ವಜನಿಕರಿಂದ ತೀವ್ರ ಟೀಕೆ ವ್ಯಕ್ತವಾಗಿದೆ. ಪಟ್ಟಣ ಪ್ರದೇಶ ಹೊರತುಪಡಿಸಿ ಗ್ರಾಮೀಣ ಪ್ರದೇಶದ ಶಾಲೆಗಳ ಮಕ್ಕಳಿಗೆ ರಜೆ ಘೊಷಣೆ ಗೊತ್ತೇ ಆಗುವುದಿಲ್ಲ. ಹೀಗಾಗಿ ಮಳೆಯಿಂದ ರಜೆ ಕೊಟ್ಟಿದ್ದರೂ ಮಕ್ಕಳು ಶಾಲೆಗೆ ಬಂದ ಮೇಲೆಯೇ ಇಂದು ರಜೆ ಎಂದು ಗೊತ್ತಾಗುವುದು. ಆಶಿಕಾ ಕೂಡ ಎಂದಿನಂತೆ ಶಾಲೆಗೆ ಬಂದಿದ್ದಳು. ಸೋಮವಾರ ಶಾಲೆ ನಡೆದಿದ್ದರೆ ಆಕೆ ನೀರು ಪಾಲಾಗುತ್ತಿರಲಿಲ್ಲ ಎಂದು ಸಾರ್ವಜನಿಕರು ಅಭಿಪ್ರಾಯಪಟ್ಟಿದ್ದಾರೆ. ಅಲ್ಲದೆ ಇನ್ನು ಮುಂದೆ ಶಾಲೆಗೆ ರಜೆ ಘೊಷಿಸುವಾಗ ಮುಂಚಿತವಾಗಿ ತಿಳಿಸುವ ವ್ಯವಸ್ಥೆ ಆಗಬೇಕು ಎಂದು ಆಗ್ರಹಿಸಿದ್ದಾರೆ.

Leave a Reply

Your email address will not be published. Required fields are marked *

Back To Top